Union Budget 2022: ਭਾਰਤ ਆਪਣੀ ਡਿਜੀਟਲ ਕਰੰਸੀ ਕਰੇਗਾ ਲਾਂਚ-ਵਿੱਤ ਮੰਤਰੀ
Union Budget 2022: ਕੇਂਦਰੀ ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਨੇ ਅੱਜ ਵਿੱਤੀ ਸਾਲ 2022-23 ਲਈ ਕੇਂਦਰੀ ਬਜਟ 2022 ਪੇਸ਼ ਕੀਤਾ। ਬਜਟ ਪੇਸ਼ ਕਰਦੇ ਹੋਏ ਨਿਰਮਲਾ ਸੀਤਾਰਮਨ ਨੇ ਡਿਜੀਟਲ ਕਰੰਸੀ ਨੂੰ ਲੈ ਕੇ ਇਕ ਵੱਡਾ ਐਲਾਨ ਕੀਤਾ, ਜਿਸ ਦੀ ਕਾਫੀ ਸਮੇਂ ਤੋਂ ਚਰਚਾ ਹੋ ਰਹੀ ਸੀ। ਆਪਣੇ ਬਜਟ ਭਾਸ਼ਣ ਦੌਰਾਨ ਕੇਂਦਰੀ ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਨੇ ਕਿਹਾ ਕਿ ਭਾਰਤੀ ਰਿਜ਼ਰਵ ਬੈਂਕ ਇਸ ਸਾਲ ਯਾਨੀ ਵਿੱਤੀ ਸਾਲ 22-23 ਵਿੱਚ ਡਿਜੀਟਲ ਕਰੰਸੀ ਜਾਰੀ ਕਰੇਗਾ।
ਇਹ ਵੀ ਪੜ੍ਹੋ: Budget 2022 Highlights: ਸਿੱਖਿਆ ਦੇ ਖੇਤਰ 'ਚ ਸਰਕਾਰ ਦੀਆਂ ਕੀ ਹੈ ਯੋਜਨਾਵਾਂ, ਜਾਣੋ ਡਿਟੇਲ
ਉਨ੍ਹਾਂ ਕਿਹਾ ਕਿ ਆਰਬੀਆਈ ਦੀ ਡਿਜੀਟਲ ਕਰੰਸੀ ਦਾ ਇੰਤਜ਼ਾਰ ਖ਼ਤਮ ਹੋਣ ਵਾਲਾ ਹੈ ਅਤੇ ਕੇਂਦਰੀ ਬੈਂਕ 2022 ਵਿੱਚ ਹੀ ਆਪਣੀ ਡਿਜੀਟਲ ਕਰੰਸੀ ਲਿਆਵੇਗਾ। ਬਜਟ ਪੇਸ਼ ਕਰਨ ਦੌਰਾਨ ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਨੇ ਕਿਹਾ ਕਿ ਬਲਾਕਚੇਨ ਅਤੇ ਹੋਰ ਤਕਨੀਕ ਦੀ ਮਦਦ ਨਾਲ ਆਰਬੀਆਈ 2022-23 ਵਿੱਚ ਡਿਜੀਟਲ ਰੁਪਿਆ ਜਾਰੀ ਕਰੇਗਾ।
ਇਸ ਨਾਲ ਅਰਥਵਿਵਸਥਾ ਨੂੰ ਹੁਲਾਰਾ ਮਿਲੇਗਾ ਅਤੇ ਇਹ ਬਿਹਤਰ ਮੁਦਰਾ ਪ੍ਰਬੰਧਨ ਦੀ ਅਗਵਾਈ ਕਰੇਗਾ। ਦੱਸ ਦੇਈਏ ਕਿ ਵਿੱਤ ਮੰਤਰੀ ਵਜੋਂ ਨਿਰਮਲਾ ਸੀਤਾਰਮਨ ਦਾ ਇਹ ਚੌਥਾ ਬਜਟ ਹੈ, ਜਦਕਿ ਮੋਦੀ ਸਰਕਾਰ ਦੇ ਕਾਰਜਕਾਲ ਦਾ ਹੁਣ ਤੱਕ ਦਾ 10ਵਾਂ ਬਜਟ ਹੈ।
ਕੀ ਹੈ ਡਿਜੀਟਲ ਕਰੰਸੀ?
ਡਿਜੀਟਲ ਕਰੰਸੀ ਰੁਪਏ ਦਾ ਇੱਕ ਰੂਪ ਹੈ। ਫਰਕ ਸਿਰਫ ਇਹ ਹੈ ਕਿ ਤੁਸੀਂ ਇਸ ਨੂੰ ਨਾ ਤਾਂ ਦੇਖ ਸਕਦੇ ਹੋ ਅਤੇ ਨਾ ਹੀ ਛੂਹ ਸਕਦੇ ਹੋ। ਇਹੀ ਕਾਰਨ ਹੈ ਕਿ ਇਸ ਨੂੰ ਡਿਜੀਟਲ ਕਰੰਸੀ ਵੀ ਕਿਹਾ ਜਾਂਦਾ ਹੈ। ਇਸ ਦਾ ਸਾਰਾ ਕਾਰੋਬਾਰ ਆਨਲਾਈਨ ਮਾਧਿਅਮ ਰਾਹੀਂ ਹੀ ਕੀਤਾ ਜਾਵੇਗਾ। ਭਾਰਤ ਦੇ ਕੇਂਦਰੀ ਬੈਂਕ ਦੁਆਰਾ ਜਾਰੀ ਕੀਤੀ ਗਈ, ਇਹ ਡਿਜੀਟਲ ਕਰੰਸੀ ਮੂਲ ਰੂਪ ਵਿੱਚ ਭਾਰਤ ਲਈ ਫਿਏਟ ਮੁਦਰਾਵਾਂ ਦਾ ਇੱਕ ਡਿਜੀਟਲ ਸੰਸਕਰਣ ਹੋਵੇਗੀ। ਭਾਰਤ ਲਈ, ਇਸ ਘਰੇਲੂ ਮੁਦਰਾ ਦੀ ਵਰਤੋਂ ਸਿਰਫ ਰੁਪਏ ਦੇ ਰੂਪ ਵਿੱਚ ਕੀਤੀ ਜਾਵੇਗੀ। ਦੱਸਿਆ ਜਾ ਰਿਹਾ ਹੈ ਕਿ ਆਰਬੀਆਈ ਇਸ 'ਤੇ ਪੂਰੀ ਤਰ੍ਹਾਂ ਕੰਮ ਕਰ ਰਿਹਾ ਹੈ।
