ਰਿਟਾਇਰਮੈਂਟ ਤੋਂ ਬਾਅਦ ਰਾਮ ਨਾਥ ਕੋਵਿੰਦ ਹੋਣਗੇ ਸੋਨੀਆ ਗਾਂਧੀ ਦੇ ਗੁਆਂਢੀ, ਮਿਲਣਗੀਆਂ ਇਹ ਸਹੂਲਤਾਂ
ਨਵੀਂ ਦਿੱਲੀ, 21 ਜੁਲਾਈ: ਰਾਸ਼ਟਰਪਤੀ ਰਾਮ ਨਾਥ ਕੋਵਿੰਦ ਦਾ ਕਾਰਜਕਾਲ 24 ਜੁਲਾਈ ਨੂੰ ਖਤਮ ਹੋ ਰਿਹਾ ਹੈ। 23 ਜੁਲਾਈ ਨੂੰ ਉੱਪ ਰਾਸ਼ਟਰਪਤੀ ਵੈਂਕਈਆ ਨਾਇਡੂ ਸੰਸਦ ਭਵਨ ਦੇ ਸੈਂਟਰਲ ਹਾਲ 'ਚ ਉਨ੍ਹਾਂ ਦੇ ਸਨਮਾਨ 'ਚ ਵਿਦਾਇਗੀ ਸਮਾਰੋਹ ਦਾ ਆਯੋਜਨ ਕਰ ਰਹੇ ਹਨ। ਇਸ ਦੌਰਾਨ ਰਾਸ਼ਟਰਪਤੀ ਕੋਵਿੰਦ ਨੂੰ ਸੰਸਦ ਮੈਂਬਰਾਂ ਵੱਲੋਂ ਹਸਤਾਖਰਾਂ ਵਾਲੀ ‘ਮੋਮੈਂਟੋ’ ਅਤੇ ‘ਹਸਤਾਖਰ ਪੁਸਤਕ’ ਵੀ ਭੇਂਟ ਕੀਤੀ ਜਾਵੇਗੀ। ਲੋਕ ਸਭਾ ਸਪੀਕਰ ਓਮ ਬਿਰਲਾ, ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਸਮੇਤ ਸਾਰੇ ਕੇਂਦਰੀ ਮੰਤਰੀ ਅਤੇ ਸੰਸਦ ਮੈਂਬਰ ਇਸ ਪ੍ਰੋਗਰਾਮ ਦਾ ਹਿੱਸਾ ਹੋਣਗੇ।
ਕਾਰਜਕਾਲ ਖਤਮ ਹੋਣ ਤੋਂ ਦੋ ਦਿਨ ਪਹਿਲਾਂ ਯਾਨੀ 22 ਜੁਲਾਈ ਨੂੰ ਰਾਸ਼ਟਰਪਤੀ ਰਾਮ ਨਾਥ ਕੋਵਿੰਦ ਦਾ ਸਾਰਾ ਸਮਾਨ ਨਵੇਂ ਬੰਗਲੇ 'ਚ ਸ਼ਿਫਟ ਕਰ ਦਿੱਤਾ ਜਾਵੇਗਾ। ਹਾਲਾਂਕਿ ਅਧਿਕਾਰਤ ਤੌਰ 'ਤੇ ਕੋਵਿੰਦ ਦੀ ਰਾਸ਼ਟਰਪਤੀ ਭਵਨ ਤੋਂ ਰਵਾਨਗੀ 25 ਜੁਲਾਈ ਨੂੰ ਹੋਵੇਗੀ।
ਕੀ ਹੋਵੇਗਾ ਰਾਸ਼ਟਰਪਤੀ ਕੋਵਿੰਦ ਦਾ ਨਵਾਂ ਪਤਾ ?
ਰਾਸ਼ਟਰਪਤੀ ਰਾਮ ਨਾਥ ਕੋਵਿੰਦ ਨੂੰ ਉਨ੍ਹਾਂ ਦਾ ਕਾਰਜਕਾਲ ਖਤਮ ਹੋਣ ਤੋਂ ਬਾਅਦ ਦਿੱਲੀ ਦੇ 12 ਜਨਪਥ 'ਤੇ ਬੰਗਲਾ ਅਲਾਟ ਕੀਤਾ ਗਿਆ ਹੈ। ਇਹ ਉਹੀ ਬੰਗਲਾ ਹੈ ਜਿੱਥੇ ਰਾਮ ਵਿਲਾਸ ਪਾਸਵਾਨ ਕੁਝ ਸਾਲ ਪਹਿਲਾਂ ਤੱਕ ਰਹਿੰਦੇ ਸਨ। ਪਾਸਵਾਨ ਦੋ ਦਹਾਕਿਆਂ ਤੋਂ ਵੱਧ ਸਮੇਂ ਤੋਂ ਇਸ ਬੰਗਲੇ ਵਿੱਚ ਰਹੇ ਸਨ। ਉਨ੍ਹਾਂ ਦੀ ਮੌਤ ਤੋਂ ਬਾਅਦ ਪਰਿਵਾਰ ਨੇ ਇਸ ਨੂੰ ਖਾਲੀ ਕਰ ਦਿੱਤਾ। ਹੁਣ ਇਹ ਬੰਗਲਾ ਰਾਮਨਾਥ ਕੋਵਿੰਦ ਨੂੰ ਅਲਾਟ ਕਰ ਦਿੱਤਾ ਗਿਆ ਹੈ।
ਰਾਸ਼ਟਰਪਤੀ ਦੀ ਬੇਟੀ ਸਵਾਤੀ ਕੋਵਿੰਦ ਨੇ ਬੰਗਲੇ ਦੇ ਨਵੀਨੀਕਰਨ ਦੇ ਕੰਮ ਦੀ ਨਿਗਰਾਨੀ ਕੀਤੀ ਹੈ। ਇਸ ਬੰਗਲੇ ਦੇ ਅੱਗੇ ਭਾਵ 10 ਜਨਪਥ 'ਤੇ ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਦੀ ਰਿਹਾਇਸ਼ ਹੈ।
ਰਿਟਾਇਰਮੈਂਟ ਤੋਂ ਬਾਅਦ ਰਾਸ਼ਟਰਪਤੀ ਕੋਵਿੰਦ ਨੂੰ ਕਿਹੜੀਆਂ ਸਹੂਲਤਾਂ ਮਿਲਣਗੀਆਂ ?
ਰਾਸ਼ਟਰਪਤੀ ਰਾਮ ਨਾਥ ਕੋਵਿੰਦ ਨੂੰ ਸੇਵਾਮੁਕਤੀ ਤੋਂ ਬਾਅਦ;
- 1.5 ਲੱਖ ਰੁਪਏ ਪ੍ਰਤੀ ਮਹੀਨਾ ਪੈਨਸ਼ਨ
- ਸਕੱਤਰੇਤ ਸਟਾਫ਼ ਅਤੇ ਦਫ਼ਤਰੀ ਖ਼ਰਚਿਆਂ ਲਈ 60 ਹਜ਼ਾਰ ਰੁਪਏ ਪ੍ਰਤੀ ਮਹੀਨਾ
- ਸਰਕਾਰ ਵੱਲੋਂ ਦਿੱਤੇ ਗਏ ਬੰਗਲੇ ਦਾ ਕਿਰਾਇਆ ਮੁਫਤ ਹੋਵੇਗਾ
- ਦੋ ਲੈਂਡਲਾਈਨ, ਮੋਬਾਈਲ ਫ਼ੋਨ, ਬ੍ਰਾਡਬੈਂਡ ਅਤੇ ਇੰਟਰਨੈੱਟ ਕੁਨੈਕਸ਼ਨ
- ਬਿਜਲੀ ਅਤੇ ਪਾਣੀ ਦੇ ਬਿੱਲ ਨਹੀਂ ਭਰਨੇ ਪੈਣਗੇ
- ਕੋਵਿੰਦ ਨੂੰ ਡਰਾਈਵਰ ਅਤੇ ਕਾਰ ਵੀ ਦਿੱਤੀ ਜਾਵੇਗੀ
- ਸਿਹਤ ਸਹੂਲਤਾਂ ਪੂਰੀ ਤਰ੍ਹਾਂ ਮੁਫਤ ਦਿੱਤੀਆਂ ਜਾਣਗੀਆਂ
- ਰੇਲ ਅਤੇ ਹਵਾਈ ਯਾਤਰਾ ਮੁਫ਼ਤ ਹੋਵੇਗੀ
- ਪੰਜ ਵਿਅਕਤੀਆਂ ਦਾ ਨਿੱਜੀ ਸਟਾਫ਼ ਮਿਲੇਗਾ
- ਸਾਰੀਆਂ ਸਹੂਲਤਾਂ ਵਾਲਾ ਮੁਫਤ ਵਾਹਨ ਦਿੱਤਾ ਜਾਵੇਗਾ
- ਦਿੱਲੀ ਪੁਲਿਸ ਦੀ ਸੁਰੱਖਿਆ ਦਿੱਤੀ ਜਾਵੇਗੀ
- ਦੋ ਸਕੱਤਰ ਵੀ ਦਿੱਤੇ ਜਾਣਗੇ
-PTC News
