Blood Cancer Symptoms : ਬਲੱਡ ਕੈਂਸਰ ਦੇ ਕੀ-ਕੀ ਹੁੰਦੇ ਹਨ ਲੱਛਣ ? ਜਾਣੋ
Blood Cancer Symptoms : ਡਾਕਟਰੀ ਭਾਸ਼ਾ 'ਚ ਬਲੱਡ ਕੈਂਸਰ ਨੂੰ ਹੇਮਾਟੋਲੋਜੀਕਲ ਕੈਂਸਰ ਵੀ ਕਿਹਾ ਜਾਂਦਾ ਹੈ। ਇਸ 'ਚ ਕਈ ਕਿਸਮਾਂ ਦੇ ਕੈਂਸਰ ਸ਼ਾਮਲ ਹੁੰਦੇ ਹਨ, ਜਿਵੇਂ ਕਿ ਖੂਨ, ਬੋਨ ਮੈਰੋ ਅਤੇ ਲਿੰਫੈਟਿਕ ਸਿਸਟਮ। ਨਾਲ ਹੀ ਇਨ੍ਹਾਂ 'ਚ ਲਿਊਕੇਮੀਆ, ਲਿਮਫੋਮਾ ਅਤੇ ਮਾਈਲੋਮਾ ਵਰਗੇ ਕੈਂਸਰ ਸ਼ਾਮਲ ਹਨ। ਇਨ੍ਹਾਂ ਕੈਂਸਰਾਂ ਦੇ ਸ਼ੁਰੂਆਤੀ ਲੱਛਣ ਅਕਸਰ ਅਸਪਸ਼ਟ ਹੁੰਦੇ ਹਨ ਜਾਂ ਹੋਰ ਆਮ ਬਿਮਾਰੀਆਂ ਨਾਲ ਮਿਲਦੇ-ਜੁਲਦੇ ਹੋ ਸਕਦੇ ਹਨ, ਜਿਸ ਕਾਰਨ ਉਨ੍ਹਾਂ ਦਾ ਛੇਤੀ ਪਤਾ ਲਗਾਉਣਾ ਮੁਸ਼ਕਲ ਹੋ ਜਾਂਦਾ ਹੈ। ਇਸ ਲਈ ਇਨ੍ਹਾਂ ਲੱਛਣਾਂ ਨੂੰ ਪਛਾਣਨਾ ਅਤੇ ਸਮੇਂ ਸਿਰ ਟੈਸਟ ਕਰਵਾਉਣਾ ਬਹੁਤ ਜ਼ਰੂਰੀ ਹੁੰਦਾ ਹੈ। ਮਾਹਿਰਾਂ ਮੁਤਾਬਕ ਬਲੱਡ ਕੈਂਸਰ ਦੇ ਲੱਛਣਾਂ ਅਤੇ ਟੈਸਟਾਂ ਦੇ ਕੁਝ ਆਮ ਤਰੀਕੇ ਹੁੰਦੇ ਹਨ, ਜਿਨ੍ਹਾਂ ਨੂੰ ਜਾਣਨਾ ਹਰ ਕਿਸੇ ਬਹੁਤ ਬਹੁਤ ਜ਼ਰੂਰੀ ਹੁੰਦਾ ਹੈ। ਤਾਂ ਆਓ ਜਾਣਦੇ ਹਾਂ ਬਲੱਡ ਕੈਂਸਰ ਦੇ ਕੀ-ਕੀ ਲੱਛਣ ਹੁੰਦੇ ਹਨ?
ਅਚਾਨਕ ਅਤੇ ਅਸਾਧਾਰਨ ਥਕਾਵਟ :
ਬਲੱਡ ਕੈਂਸਰ ਦਾ ਪਹਿਲਾ ਅਤੇ ਸਭ ਤੋਂ ਆਮ ਲੱਛਣ ਅਸਧਾਰਨ ਥਕਾਵਟ ਹੈ। ਦਸ ਦਈਏ ਕਿ ਇਹ ਥਕਾਵਟ ਬਿਨਾਂ ਕਿਸੇ ਸਪੱਸ਼ਟ ਕਾਰਨ ਦੇ ਹੁੰਦੀ ਹੈ ਅਤੇ ਆਰਾਮ ਕਰਨ ਤੋਂ ਬਾਅਦ ਵੀ ਦੂਰ ਨਹੀਂ ਹੁੰਦੀ। ਅਜਿਹੇ 'ਚ ਜੇਕਰ ਤੁਸੀਂ ਲਗਾਤਾਰ ਥਕਾਵਟ ਮਹਿਸੂਸ ਕਰ ਰਹੇ ਹੋ ਅਤੇ ਇਸ ਦਾ ਕਾਰਨ ਨਹੀਂ ਸਮਝ ਪਾ ਰਹੇ ਹੋ ਤਾਂ ਇਹ ਬਲੱਡ ਕੈਂਸਰ ਦੀ ਸ਼ੁਰੂਆਤੀ ਨਿਸ਼ਾਨੀ ਹੋ ਸਕਦੀ ਹੈ।
ਵਾਰ-ਵਾਰ ਬਿਮਾਰ ਹੋਣਾ :
ਮਾਹਿਰਾਂ ਮੁਤਾਬਕ ਬਲੱਡ ਕੈਂਸਰ ਸਰੀਰ ਦੀ ਇਮਿਊਨ ਸਿਸਟਮ ਨੂੰ ਕਮਜ਼ੋਰ ਕਰ ਦਿੰਦਾ ਹੈ, ਜਿਸ ਕਾਰਨ ਵਾਰ-ਵਾਰ ਇਨਫੈਕਸ਼ਨ ਹੋ ਜਾਂਦੀ ਹੈ। ਮਰੀਜ਼ਾਂ ਨੂੰ ਅਕਸਰ ਜ਼ੁਕਾਮ, ਫਲੂ ਜਾਂ ਹੋਰ ਲਾਗ ਲੱਗ ਸਕਦੀ ਹੈ ਅਤੇ ਠੀਕ ਹੋਣ 'ਚ ਆਮ ਨਾਲੋਂ ਜ਼ਿਆਦਾ ਸਮਾਂ ਲੱਗ ਸਕਦਾ ਹੈ। ਅਜਿਹੇ 'ਚ ਜੇਕਰ ਤੁਸੀਂ ਵਾਰ-ਵਾਰ ਬਿਮਾਰ ਹੋ ਰਹੇ ਹੋ, ਤਾਂ ਇਹ ਚੇਤਾਵਨੀ ਦਾ ਸੰਕੇਤ ਹੋ ਸਕਦਾ ਹੈ।
ਸਰੀਰ 'ਤੇ ਅਚਾਨਕ ਨੀਲੇ ਨਿਸ਼ਾਨ ਜਾਂ ਖੂਨ ਵਗਣਾ :
ਜੇਕਰ ਤੁਹਾਡੇ ਸਰੀਰ 'ਤੇ ਬਿਨਾਂ ਕਿਸੇ ਕਾਰਨ ਦੇ ਨੀਲੇ ਨਿਸ਼ਾਨ (ਜ਼ਖਮ) ਪੈ ਜਾਂਦੇ ਹਨ ਜਾਂ ਤੁਹਾਡੀ ਨੱਕ 'ਚੋਂ ਵਾਰ-ਵਾਰ ਖੂਨ ਵਗਦਾ ਹੈ ਜਾਂ ਤੁਹਾਡੇ ਮਸੂੜਿਆਂ 'ਚੋਂ ਖੂਨ ਨਿਕਲਦਾ ਹੈ, ਤਾਂ ਇਹ ਬਲੱਡ ਕੈਂਸਰ ਦੀ ਨਿਸ਼ਾਨੀ ਹੋ ਸਕਦੀ ਹੈ। ਮਾਹਿਰਾਂ ਮੁਤਾਬਕ ਇਹ ਸਮੱਸਿਆ ਸਰੀਰ 'ਚ ਪਲੇਟਲੈਟਸ ਦੀ ਕਮੀ ਦੇ ਕਾਰਨ ਹੁੰਦੀ ਹੈ, ਜੋ ਖੂਨ ਦੇ ਥੱਕੇ ਬਣਾਉਣ 'ਚ ਮਦਦ ਕਰਦੇ ਹਨ।
ਗੰਢਾਂ :
ਜੇਕਰ ਤੁਹਾਡੀ ਗਰਦਨ, ਕੱਛ ਜਾਂ ਪੱਟ ਦੇ ਖੇਤਰ 'ਚ ਲਿੰਫ ਨੋਡਸ ਸੁੱਜੇ ਹੋਏ ਹਨ, ਤਾਂ ਇਹ ਲਿੰਫੋਮਾ ਦਾ ਲੱਛਣ ਹੋ ਸਕਦਾ ਹੈ, ਜੋ ਕਿ ਬਲੱਡ ਕੈਂਸਰ ਦੀ ਇੱਕ ਕਿਸਮ ਹੈ। ਇਹ ਸੁੱਜੀਆਂ ਗੰਢਾਂ ਦਰਦ ਦਾ ਕਾਰਨ ਨਹੀਂ ਬਣਦੀਆਂ, ਪਰ ਇਨ੍ਹਾਂ ਨੂੰ ਨਜ਼ਰਅੰਦਾਜ਼ ਕਰਨਾ ਖਤਰਨਾਕ ਹੋ ਸਕਦਾ ਹੈ।
ਹੱਡੀਆਂ 'ਚ ਦਰਦ :
ਕੁਝ ਬਲੱਡ ਕੈਂਸਰ, ਜਿਵੇਂ ਕਿ ਮਾਈਲੋਮਾ, ਹੱਡੀਆਂ ਦੇ ਦਰਦ ਦਾ ਕਾਰਨ ਬਣ ਸਕਦੇ ਹਨ, ਖਾਸ ਕਰਕੇ ਪਿੱਠ ਜਾਂ ਪਸਲੀਆਂ 'ਚ। ਦਸ ਦਈਏ ਕਿ ਜੇਕਰ ਤੁਸੀਂ ਆਪਣੀਆਂ ਹੱਡੀਆਂ 'ਚ ਲਗਾਤਾਰ ਦਰਦ ਮਹਿਸੂਸ ਕਰ ਰਹੇ ਹੋ, ਤਾਂ ਇਸਨੂੰ ਗੰਭੀਰਤਾ ਨਾਲ ਲਓ ਅਤੇ ਡਾਕਟਰ ਦੀ ਸਲਾਹ ਲਓ।
ਫਿੱਕੀ ਚਮੜੀ ਜਾਂ ਅਨੀਮੀਆ :
ਬਲੱਡ ਕੈਂਸਰ ਲਾਲ ਰਕਤਾਣੂਆਂ ਦੀ ਗਿਣਤੀ 'ਚ ਕਮੀ ਦਾ ਕਾਰਨ ਬਣ ਸਕਦਾ ਹੈ, ਜੋ ਅਨੀਮੀਆ ਦਾ ਕਾਰਨ ਬਣਦਾ ਹੈ। ਇਸ ਦੇ ਨਤੀਜੇ ਵਜੋਂ ਚਮੜੀ ਫਿੱਕੀ, ਸਾਹ ਚੜ੍ਹਨਾ ਅਤੇ ਚੱਕਰ ਆਉਣੇ ਹੋ ਸਕਦੇ ਹਨ। ਜੇਕਰ ਤੁਸੀਂ ਇਹ ਲੱਛਣ ਦੇਖਦੇ ਹੋ ਤਾਂ ਤੁਰੰਤ ਜਾਂਚ ਕਰਵਾਓ।
ਬੁਖਾਰ ਅਤੇ ਰਾਤ ਨੂੰ ਪਸੀਨਾ ਆਉਣਾ :
ਬਿਨਾਂ ਕਿਸੇ ਸਪੱਸ਼ਟ ਕਾਰਨ ਦੇ ਬੁਖਾਰ ਹੋਣਾ ਅਤੇ ਰਾਤ ਨੂੰ ਪਸੀਨੇ 'ਚ ਭਿੱਜ ਜਾਣਾ ਵੀ ਬਲੱਡ ਕੈਂਸਰ ਦੀ ਨਿਸ਼ਾਨੀ ਹੋ ਸਕਦੀ ਹੈ। ਇਹ ਲੱਛਣ ਅਕਸਰ ਆਉਂਦੇ ਅਤੇ ਜਾਂਦੇ ਰਹਿੰਦੇ ਹਨ ਅਤੇ ਇਨ੍ਹਾਂ ਦਾ ਕੋਈ ਸਪੱਸ਼ਟ ਕਾਰਨ ਨਹੀਂ ਹੁੰਦਾ।
ਬਲੱਡ ਕੈਂਸਰ ਦੀ ਜਾਂਚ ਦੇ ਆਮ ਤਰੀਕੇ
ਸੰਪੂਰਨ ਖੂਨ ਦੀ ਗਿਣਤੀ (CBC) :
ਇਹ ਟੈਸਟ ਖੂਨ 'ਚ ਲਾਲ ਖੂਨ ਦੇ ਸੈੱਲਾਂ, ਚਿੱਟੇ ਰਕਤਾਣੂਆਂ ਅਤੇ ਪਲੇਟਲੈਟਾਂ ਦੇ ਪੱਧਰ ਨੂੰ ਮਾਪਦਾ ਹੈ। ਅਸਧਾਰਨ ਗਿਣਤੀ ਬਲੱਡ ਕੈਂਸਰ ਦਾ ਸੰਕੇਤ ਦੇ ਸਕਦੀ ਹੈ।
ਬੋਨ ਮੈਰੋ ਬਾਇਓਪਸੀ :
ਇਸ ਵਿਧੀ 'ਚ, ਬੋਨ ਮੈਰੋ ਦਾ ਇੱਕ ਛੋਟਾ ਜਿਹਾ ਨਮੂਨਾ ਕੱਢਿਆ ਜਾਂਦਾ ਹੈ ਅਤੇ ਇਸ 'ਚ ਕੈਂਸਰ ਸੈੱਲਾਂ ਦੀ ਮੌਜੂਦਗੀ ਦੀ ਜਾਂਚ ਕੀਤੀ ਜਾਂਦੀ ਹੈ।
ਇਮੇਜਿੰਗ ਟੈਸਟ :
ਸਰੀਰ ਦੇ ਦੂਜੇ ਹਿੱਸਿਆਂ 'ਚ ਕੈਂਸਰ ਦੇ ਲੱਛਣਾਂ ਦੀ ਜਾਂਚ ਕਰਨ ਲਈ ਐਕਸ-ਰੇ, ਸੀਟੀ ਸਕੈਨ ਜਾਂ ਪੀਈਟੀ ਸਕੈਨ ਦੀ ਵਰਤੋਂ ਕੀਤੀ ਜਾਂਦੀ ਹੈ।
ਸਾਇਟੋਜੈਨੇਟਿਕ ਟੈਸਟਿੰਗ :
ਮਾਹਿਰਾਂ ਮੁਤਾਬਕ ਇਹ ਟੈਸਟ ਬਲੱਡ ਕੈਂਸਰ ਦਾ ਪਤਾ ਲਗਾਉਣ ਲਈ ਖੂਨ ਜਾਂ ਬੋਨ ਮੈਰੋ ਸੈੱਲਾਂ ਦੇ ਕ੍ਰੋਮੋਸੋਮ ਦੀ ਜਾਂਚ ਕਰਦਾ ਹੈ।
( ਡਿਸਕਲੇਮਰ : ਇਹ ਲੇਖ ਆਮ ਜਾਣਕਾਰੀ ਲਈ ਹੈ ਕੋਈ ਵੀ ਉਪਾਅ ਅਪਣਾਉਣ ਤੋਂ ਪਹਿਲਾਂ ਤੁਹਾਨੂੰ ਡਾਕਟਰ ਦੀ ਸਲਾਹ ਜ਼ਰੂਰ ਲੈਣੀ ਚਾਹੀਦੀ ਹੈ। )
- PTC NEWS
