Kedarnath Yatra 2025 Safety Tips : ਕੇਦਾਰਨਾਥ ਜਾਣ ਵਾਲੇ ਯਾਤਰੀ ਅਪਣਾਉਣ ਇਹ ਟਿਪਸ, ਯਾਤਰਾ ਰਹੇਗੀ ਸੁਰੱਖਿਅਤ
Kedarnath Yatra 2025 Safety Tips : ਭੋਲੇਨਾਥ ਦੇ ਬਹੁਤ ਸਾਰੇ ਮੰਦਰ ਹਨ ਅਤੇ ਸ਼ਰਧਾਲੂਆਂ ਦੀ ਹਰੇਕ ਵਿੱਚ ਵੱਖੋ-ਵੱਖਰੀ ਆਸਥਾ ਹੈ। ਉੱਤਰਾਖੰਡ ਦਾ ਮਸ਼ਹੂਰ ਕੇਦਾਰਨਾਥ ਧਾਮ ਸ਼ਿਵ ਭਗਤਾਂ ਲਈ ਇੱਕ ਪਵਿੱਤਰ ਸਥਾਨ ਹੈ। ਕੇਦਾਰਨਾਥ ਮੰਦਰ ਹਿਮਾਲਿਆ ਦੀਆਂ ਉੱਚੀਆਂ ਥਾਵਾਂ 'ਤੇ ਸਥਿਤ ਹੈ, ਜਿੱਥੇ ਸਰਦੀਆਂ ਦੌਰਾਨ ਭਾਰੀ ਬਰਫ਼ਬਾਰੀ ਹੁੰਦੀ ਹੈ। ਬਰਫ਼ਬਾਰੀ ਕਾਰਨ ਉੱਥੇ ਜਾਣ ਵਾਲੇ ਸਾਰੇ ਰਸਤੇ ਬੰਦ ਹੋ ਜਾਂਦੇ ਹਨ, ਇਸ ਲਈ ਹਰ ਸਾਲ ਸਰਦੀਆਂ ਦੀ ਸ਼ੁਰੂਆਤ ਤੋਂ ਪਹਿਲਾਂ ਮੰਦਰ ਦੇ ਦਰਵਾਜ਼ੇ ਬੰਦ ਕਰ ਦਿੱਤੇ ਜਾਂਦੇ ਹਨ ਅਤੇ ਮਈ ਦੇ ਮਹੀਨੇ ਵਿੱਚ ਦਰਵਾਜ਼ੇ ਫਿਰ ਖੁੱਲ੍ਹਦੇ ਹਨ। ਇਸ ਸਾਲ 2 ਮਈ ਨੂੰ ਕੇਦਾਰਨਾਥ ਧਾਮ ਦੇ ਦਰਵਾਜ਼ੇ ਸ਼ਰਧਾਲੂਆਂ ਲਈ ਖੁੱਲ੍ਹਣਗੇ।
ਹਰ ਸਾਲ ਹਜ਼ਾਰਾਂ ਸ਼ਰਧਾਲੂ ਉੱਤਰਾਖੰਡ ਦੇ ਚਾਰ ਮਸ਼ਹੂਰ ਧਾਮਾਂ ਵਿੱਚੋਂ ਇੱਕ ਬਦਰੀਨਾਥ, ਕੇਦਾਰਨਾਥ, ਗੰਗੋਤਰੀ ਅਤੇ ਯਮੁਨੋਤਰੀ ਦੇ ਦਰਸ਼ਨਾਂ ਲਈ ਆਉਂਦੇ ਹਨ। ਜੇਕਰ ਤੁਸੀਂ ਵੀ ਇਸ ਸਾਲ ਕੇਦਾਰਨਾਥ ਧਾਮ ਜਾਣ ਜਾ ਰਹੇ ਹੋ, ਤਾਂ ਸੁਰੱਖਿਅਤ ਯਾਤਰਾ ਲਈ ਇੱਥੇ ਦਿੱਤੇ ਗਏ ਯਾਤਰਾ ਸੁਝਾਵਾਂ ਦੀ ਪਾਲਣਾ ਕਰੋ।
ਪਹਿਲਾਂ ਤੋਂ ਤਿਆਰੀ ਕਰੋ
ਕੇਦਾਰਨਾਥ ਨੂੰ ਜਾਣ ਵਾਲਾ ਰਸਤਾ 16 ਕਿਲੋਮੀਟਰ ਲੰਬਾ ਹੈ ਅਤੇ ਇਸਦੀ ਯਾਤਰਾ ਸਰੀਰਕ ਅਤੇ ਮਾਨਸਿਕ ਤੌਰ 'ਤੇ ਥਕਾ ਦੇਣ ਵਾਲੀ ਹੈ। ਇਸ ਲਈ ਸਾਰਿਆਂ ਨੂੰ ਕੇਦਾਰਨਾਥ ਯਾਤਰਾ ਤੋਂ ਘੱਟੋ-ਘੱਟ ਇੱਕ ਮਹੀਨਾ ਪਹਿਲਾਂ ਤਿਆਰੀ ਸ਼ੁਰੂ ਕਰ ਦੇਣੀ ਚਾਹੀਦੀ ਹੈ। ਕੇਦਾਰਨਾਥ ਮੰਦਿਰ ਦੀ ਸੁਰੱਖਿਅਤ ਯਾਤਰਾ ਲਈ, ਤੇਜ਼ ਸੈਰ, ਹਲਕਾ ਜਾਗਿੰਗ ਅਤੇ ਸਾਹ ਲੈਣ ਦੀਆਂ ਕਸਰਤਾਂ ਉਹ ਤਰੀਕੇ ਹਨ ਜਿਨ੍ਹਾਂ ਨਾਲ ਤੁਸੀਂ ਆਪਣੇ ਆਪ ਨੂੰ ਚੁਣੌਤੀਪੂਰਨ ਟ੍ਰੈਕ ਲਈ ਤਿਆਰ ਕਰ ਸਕਦੇ ਹੋ।
ਆਪਣੇ ਨਾਲ ਸਨੈਕਸ ਲੈ ਜਾਓ
ਮੰਦਰ ਨੂੰ ਜਾਣ ਵਾਲਾ ਰਸਤਾ ਲੰਮਾ ਅਤੇ ਔਖਾ ਹੈ। ਅਜਿਹੀ ਸਥਿਤੀ ਵਿੱਚ, ਸਰੀਰਕ ਤੌਰ 'ਤੇ ਥਕਾਵਟ ਮਹਿਸੂਸ ਹੋਣਾ ਆਮ ਗੱਲ ਹੈ। ਇਸ ਲਈ ਆਪਣੀ ਸਿਹਤ ਅਤੇ ਊਰਜਾ ਬਣਾਈ ਰੱਖਣ ਲਈ, ਸੁੱਕਾ ਭੋਜਨ, ਮੂੰਗਫਲੀ, ਖਜੂਰ, ਚਾਕਲੇਟ ਅਤੇ ਊਰਜਾ ਬਾਰ ਵਰਗੇ ਹਲਕੇ ਸਨੈਕਸ ਆਪਣੇ ਨਾਲ ਰੱਖੋ।
ਪਹਿਲਾਂ ਤੋਂ ਬੁੱਕ ਕਰੋ
ਕੇਦਾਰਨਾਥ ਵਿੱਚ ਯਾਤਰੀਆਂ ਲਈ ਰਿਹਾਇਸ਼ ਦੇ ਬਹੁਤ ਸਾਰੇ ਵਿਕਲਪ ਹਨ। ਹਾਲਾਂਕਿ, ਚਾਰ ਧਾਮ ਯਾਤਰਾ ਦੌਰਾਨ ਯਾਤਰੀਆਂ ਦੀ ਵੱਡੀ ਗਿਣਤੀ ਦੇ ਕਾਰਨ ਕਮਰੇ ਭਰ ਸਕਦੇ ਹਨ, ਇਸ ਲਈ ਪਹਿਲਾਂ ਤੋਂ ਬੁੱਕ ਕਰਨਾ ਨਾ ਭੁੱਲੋ।
ਆਪਣੀਆਂ ਆਦਤਾਂ ਦਾ ਧਿਆਨ ਰੱਖੋ
ਗੜ੍ਹਵਾਲ ਹਿਮਾਲਿਆ ਦੀ ਸੁੰਦਰਤਾ ਅਤੇ ਆਲੇ ਦੁਆਲੇ ਦੇ ਨਜ਼ਾਰਿਆਂ ਦੇ ਕਾਰਨ, ਤੁਸੀਂ ਕੇਦਾਰਨਾਥ ਦੀ ਯਾਤਰਾ ਦੌਰਾਨ ਲਗਭਗ ਹਰ ਮਿੰਟ ਅਜਿਹੇ ਬਹੁਤ ਸਾਰੇ ਨਜ਼ਾਰੇ ਵੇਖੋਗੇ, ਜਿਨ੍ਹਾਂ ਨੂੰ ਵੇਖਦੇ ਹੀ ਤੁਹਾਡਾ ਮਨ ਉਨ੍ਹਾਂ ਦੀਆਂ ਤਸਵੀਰਾਂ ਲੈਣ ਨੂੰ ਕਰੇਗਾ। ਹਾਲਾਂਕਿ, ਇੱਥੇ ਉਨ੍ਹਾਂ ਦੀਆਂ ਤਸਵੀਰਾਂ ਲੈਣ ਤੋਂ ਪਹਿਲਾਂ ਹਮੇਸ਼ਾ ਸਥਾਨਕ ਲੋਕਾਂ ਤੋਂ ਪੁੱਛੋ। ਇਸ ਤੋਂ ਇਲਾਵਾ, ਪਲਾਸਟਿਕ ਦੀਆਂ ਪਾਣੀ ਦੀਆਂ ਬੋਤਲਾਂ ਜਾਂ ਖਾਣ-ਪੀਣ ਦੀਆਂ ਚੀਜ਼ਾਂ ਦੇ ਖਾਲੀ ਪੈਕੇਟ ਕਿਤੇ ਵੀ ਨਾ ਸੁੱਟੋ। ਜੇਕਰ ਕੋਈ ਕੂੜੇਦਾਨ ਨਹੀਂ ਹੈ, ਤਾਂ ਉਹਨਾਂ ਨੂੰ ਆਪਣੇ ਕੋਲ ਰੱਖੋ।
ਜ਼ਰੂਰੀ ਚੀਜ਼ਾਂ ਆਪਣੇ ਨਾਲ ਰੱਖੋ
ਕੇਦਾਰਨਾਥ ਯਾਤਰਾ ਦੌਰਾਨ, ਤੁਹਾਨੂੰ ਸਵੈਟਰ, ਜੈਕੇਟ, ਥਰਮਲ, ਜੁੱਤੇ, ਦਸਤਾਨੇ, ਆਈਡੀ ਕਾਰਡ, ਰੇਨਕੋਟ, ਸਨਸਕ੍ਰੀਨ ਅਤੇ ਪਾਵਰ ਬੈਂਕ ਵਰਗੀਆਂ ਜ਼ਰੂਰੀ ਚੀਜ਼ਾਂ ਆਪਣੇ ਨਾਲ ਰੱਖਣੀਆਂ ਚਾਹੀਦੀਆਂ ਹਨ। ਬੈਟਰੀ ਨਾਲ ਚੱਲਣ ਵਾਲੀ ਟਾਰਚ ਵੀ ਉਪਯੋਗੀ ਹੋ ਸਕਦੀ ਹੈ।
ਇਹ ਵੀ ਪੜ੍ਹੋ : Local Cadres Helped Pakistani : ਪਹਿਲਗਾਮ ਹਮਲੇ ਵਿੱਚ 15 ਕਸ਼ਮੀਰੀਆਂ ਨੇ ਅੱਤਵਾਦੀਆਂ ਦੀ ਕੀਤੀ ਮਦਦ, ਜਾਂਚ ’ਚ ਹੋਇਆ ਖੁਲਾਸਾ
- PTC NEWS
