Gurdaspur News : ਦੁੱਧ ਵਿੱਚ ਕਚਰਾ ਪੈਣ 'ਤੇ ਹੋਈ ਖੂਨੀ ਝੜਪ ,ਦੋਹਾਂ ਧਿਰ ਦੇ 5 ਜਾਣੇ ਜ਼ਖਮੀ
Gurdaspur News : ਗੁਰਦਾਸਪੁਰ ਦੇ ਕਸਬਾ ਦੀਨਾ ਨਗਰ ਦੇ ਪਿੰਡ ਭਟੋਆ ਵਿੱਚ ਦੁੱਧ ਵਿੱਚ ਕਚਰਾ ਪੈਣ ਤੋਂ ਬਾਅਦ ਹੋਈ ਹਲਕੀ ਤਕਰਾਰ ਖੂਨੀ ਝੜਪ ਵਿੱਚ ਬਦਲ ਗਈ। ਜਿਸ ਵਿੱਚ ਦੋਹਾਂ ਧਿਰਾਂ ਦੇ 5 ਵਿਅਕਤੀਆਂ ਦੇ ਜ਼ਖਮੀ ਹੋਣ ਦੀ ਖ਼ਬਰ ਸਾਹਮਣੇ ਆਈ ਹੈ। ਹਾਲਾਂਕਿ ਦੋਵੇਂ ਧਿਰਾਂ ਇੱਕ ਦੂਜੇ 'ਤੇ ਹਮਲਾ ਕਰਨ ਦੇ ਦੋਸ਼ ਲਗਾ ਰਹੀਆਂ ਹਨ।
ਪਿੰਡ ਭਟੋਆ ਦੇ ਰਹਿਣ ਵਾਲੇ ਸੰਦੀਪ ਸਿੰਘ ਸੈਣੀ ਨੇ ਆਰੋਪ ਲਗਾਇਆ ਕਿ ਉਹ ਆਪਣੀ ਹਵੇਲੀ ਵਿੱਚ ਡੰਗਰਾਂ ਦਾ ਦੁੱਧ ਚੋਅ ਰਿਹਾ ਸੀ ਕਿ ਦੀਪੂ ਠਾਕੁਰ ਨੇ ਗਲੀ ਵਿੱਚ ਸਫ਼ਾਈ ਕਰਦਿਆਂ ਕਚਰਾ ਉਨਾਂ ਦੀ ਹਵੇਲੀ ਵੱਲ ਸੁੱਟ ਦਿੱਤਾ ਅਤੇ ਕਚਰਾ ਦੁੱਧ ਦੀ ਬਾਲਟੀ ਵਿੱਚ ਪੈ ਗਿਆ। ਜਿਸ ਕਾਰਨ ਉਸ ਨੂੰ ਦੁੱਧ ਡੋਲਣਾ ਪਿਆ ਤੇ ਉਹ ਜਦੋਂ ਬਾਲਟੀ ਨੂੰ ਧੋਣ ਆਪਣੇ ਘਰ ਗਿਆ ਤਾਂ ਗਲੀ ਵਿੱਚ ਦੀਪੂ ਠਾਕੁਰ ਨੂੰ ਪੁੱਛਿਆ ਕਿ ਇਹ ਕਿਉਂ ਕੀਤਾ ਹੈ ਤਾਂ ਉਸਨੇ ਕਿਹਾ ਹੁਣੇ ਦੱਸਦਾ। ਨਾਲ ਹੀ ਉਹ ਆਪਣੇ ਭਰਾਵਾਂ ਨਾਲ ਉਸਦੇ ਘਰ ਆ ਗਿਆ ਤੇ ਉਹਨਾਂ 'ਤੇ ਤੇਜ਼ਧਾਰ ਹਥਿਆਰਾਂ ਨਾਲ ਹਮਲਾ ਕਰਕੇ ਉਸ ਨੂੰ ਅਤੇ ਉਸਦੇ ਭਰਾ ਨੂੰ ਜ਼ਖਮੀ ਕਰ ਦਿੱਤਾ।
ਦੂਜੇ ਪਾਸੇ ਦੂਜੀ ਧਿਰ ਦੇ ਸੰਦੀਪ ਸਿੰਘ ਠਾਕੁਰ ਨੇ ਦੋਸ਼ ਲਗਾਇਆ ਕਿ ਉਹ ਗਲੀ ਦੀ ਸਫਾਈ ਕਰ ਰਿਹਾ ਸੀ ਤਾਂ ਸੰਦੀਪ ਸਿੰਘ ਸੈਨੀ ਅਤੇ ਉਸਦੇ ਭਰਾ ਉਹਨਾਂ ਦੇ ਘਰ ਆ ਗਏ ਅਤੇ ਤੇਜ਼ਧਾਰ ਹਥਿਆਰਾਂ ਨਾਲ ਹਮਲਾ ਕਰ ਦਿੱਤਾ। ਜਿਸ ਕਾਰਨ ਉਹ ਤਿੰਨੋਂ ਭਰਾ ਜ਼ਖਮੀ ਹੋ ਗਏ। ਉਸਨੇ ਕਿਹਾ ਕਿ ਜਦੋਂ ਉਸਦੇ ਭਰਾ ਵੀ ਆ ਗਏ ਤਾਂ ਉਹਨਾਂ ਨੇ ਹਮਲਾਵਰਾਂ ਕੋਲੋਂ ਹਥਿਆਰ ਖੋ ਲਏ।
- PTC NEWS