Digital Arrest ਦੀ ਬਲੈਕਮੇਲਿੰਗ ਤੋਂ 'ਜ਼ਿੰਦਗੀ' ਹਾਰਿਆ ਬਜ਼ੁਰਗ ਜੋੜਾ, ਦੁੱਖ ਨਾਲ ਪੱਤਰ ਵੀ ਚੀਕ ਉਠਿਆ - ''ਜਨਵਰੀ ਤੋਂ ਹੀ ਠੱਗਾਂ ਨੇ ਸਾਨੂੰ ਆਪਣਾ ਨਿਸ਼ਾਨਾ...''
Karnataka Digital Arrest Death Story : ਦੇਸ਼ ਵਿੱਚ ਡਿਜੀਟਲ ਗ੍ਰਿਫਤਾਰੀ ਦਾ ਵਰਤਾਰਾ ਇੱਕ ਚੁਣੌਤੀ ਬਣਦਾ ਜਾ ਰਿਹਾ ਹੈ। ਕਰਨਾਟਕ ਦੇ ਬੇਲਾਗਾਵੀ ਜ਼ਿਲ੍ਹੇ ਦੇ ਖਾਨਪੁਰ ਤਾਲੁਕ ਵਿੱਚ ਇੱਕ ਬਜ਼ੁਰਗ ਜੋੜੇ ਦੀ ਦਰਦਨਾਕ ਕਹਾਣੀ ਨੇ ਸਾਰਿਆਂ ਦਾ ਦਿਲ ਹਿਲਾ ਕੇ ਰੱਖ ਦਿੱਤਾ ਹੈ। 83 ਸਾਲਾ ਡਿਏਗੋ ਸੈਂਟਾਨਾ ਨਾਜ਼ਰੇਥ ਅਤੇ ਉਸ ਦੀ 80 ਸਾਲਾ ਪਤਨੀ ਫਲਾਵੀਆਨਾ, ਜੋ ਕ੍ਰਿਸਚੀਅਨ ਗਲੀ ਵਿੱਚ ਆਪਣੇ ਘਰ ਵਿੱਚ ਰਹਿੰਦੀ ਸੀ, ਨੇ ਵੀਰਵਾਰ ਦੇਰ ਸ਼ਾਮ ਆਪਣੀ ਜੀਵਨਲੀਲਾ ਸਮਾਪਤ ਕਰ ਲਈ। ਇਹ ਕਹਾਣੀ ਸਿਰਫ਼ ਇੱਕ ਘਟਨਾ ਨਹੀਂ ਹੈ, ਸਗੋਂ ਆਨਲਾਈਨ ਧੋਖੇਬਾਜ਼ਾਂ ਦੇ ਜਾਲ ਵਿੱਚ ਫਸ ਕੇ ਟੁੱਟੇ ਸੁਪਨਿਆਂ ਅਤੇ ਬੇਵੱਸੀ ਦੀ ਤਸਵੀਰ ਹੈ।
ਪੁਲਿਸ ਮੁਤਾਬਕ ਪਤੀ-ਪਤਨੀ ਨੇ ਨੀਂਦ ਦੀਆਂ ਗੋਲੀਆਂ ਖਾ ਕੇ ਆਪਣੀ ਜੀਵਨਲੀਲਾ ਸਮਾਪਤ ਕੀਤੀ। ਡਿਏਗੋ ਨੇ ਪਹਿਲਾਂ ਦਾਤਰੀ ਨਾਲ ਆਪਣੀ ਗਰਦਨ ਕੱਟਣ ਦੀ ਕੋਸ਼ਿਸ਼ ਕੀਤੀ ਅਤੇ ਫਿਰ ਪਾਣੀ ਦੀ ਟੈਂਕੀ ਵਿੱਚ ਛਾਲ ਮਾਰ ਦਿੱਤੀ। ਮਹਾਰਾਸ਼ਟਰ ਸਰਕਾਰ ਤੋਂ ਇੱਕ ਅਧਿਕਾਰੀ ਦੇ ਤੌਰ 'ਤੇ ਸੇਵਾਮੁਕਤ ਹੋਏ ਡਿਏਗੋ ਨੇ ਇੱਕ ਨੋਟ ਛੱਡਿਆ, ਜਿਸ ਵਿੱਚ ਬਜ਼ੁਰਗ ਜੋੜੇ ਦੇ ਦਰਦ ਨੂੰ ਸਮਝਿਆ ਜਾ ਸਕਦਾ ਹੈ।
ਕੀ ਹੈ Digital Arrest, ਪਛਾਣ ਕਿਵੇਂ ਕਰੀਏ? ਜਾਣੋ ਠੱਗਾਂ ਤੋਂ ਬਚਣ ਦਾ ਤਰੀਕਾ
ਅੰਗਰੇਜ਼ੀ ਵਿੱਚ ਲਿਖੇ ਇਸ ਨੋਟ ਵਿੱਚ ਉਸ ਨੇ ਦੱਸਿਆ ਕਿ ਠੱਗਾਂ ਨੇ ਜਨਵਰੀ ਤੋਂ ਉਸ ਨੂੰ ਆਪਣਾ ਨਿਸ਼ਾਨਾ ਬਣਾਇਆ ਸੀ। ਧੋਖਾਧੜੀ ਕਰਨ ਵਾਲਿਆਂ ਨੇ, ਨਵੀਂ ਦਿੱਲੀ ਦੇ ਦੂਰਸੰਚਾਰ ਅਧਿਕਾਰੀ ਵਜੋਂ, ਡਿਏਗੋ ਅਤੇ ਫਲਾਵੀਆਨਾ 'ਤੇ ਆਪਣੇ ਮੋਬਾਈਲ ਸਿਮ ਦੀ ਦੁਰਵਰਤੋਂ ਕਰਕੇ "ਅਪਰਾਧਿਕ ਗਤੀਵਿਧੀਆਂ" ਕਰਨ ਦਾ ਦੋਸ਼ ਲਗਾਇਆ ਸੀ। ਇਨ੍ਹਾਂ ਠੱਗਾਂ ਨੇ ਉਨ੍ਹਾਂ ਨੂੰ ਡਿਜ਼ੀਟਲ ਗ੍ਰਿਫਤਾਰੀ ਦੀਆਂ ਧਮਕੀਆਂ ਦੇ ਕੇ ਬਜ਼ੁਰਗ ਜੋੜੇ ਨੂੰ ਡਰ ਦੇ ਮਾਹੌਲ ਵਿੱਚ ਰਹਿਣ ਲਈ ਮਜਬੂਰ ਕਰ ਦਿੱਤਾ ਸੀ।
ਸੁਸਾਈਡ ਨੋਟ 'ਚ 2 ਨਾਮ ਆਏ ਸਾਹਮਣੇ
ਨੋਟ ਵਿੱਚ ਦੋ ਨਾਮ ਸਾਹਮਣੇ ਆਏ ਹਨ, ਸੁਮਿਤ ਬਿਰਾ ਅਤੇ ਅਨਿਲ ਯਾਦਵ। ਇਨ੍ਹਾਂ ਲੋਕਾਂ ਨੇ ਜੋੜੇ ਤੋਂ 5 ਲੱਖ ਰੁਪਏ ਦੀ ਠੱਗੀ ਮਾਰੀ ਅਤੇ ਫਿਰ ਹੋਰ ਪੈਸਿਆਂ ਦੀ ਮੰਗ ਕਰਨ ਲੱਗੇ। ਡਿਏਗੋ ਨੇ ਲਿਖਿਆ ਕਿ ਇਸ ਦਬਾਅ ਨੂੰ ਝੱਲਣ ਲਈ ਉਸਨੇ ਗੋਆ ਅਤੇ ਮੁੰਬਈ ਦੇ ਲੋਕਾਂ ਤੋਂ ਲੋਨ ਵਜੋਂ ਪੈਸੇ ਲਏ। ਨੋਟ ਵਿੱਚ ਇਹ ਵੀ ਬੇਨਤੀ ਕੀਤੀ ਹੈ ਕਿ ਉਨ੍ਹਾਂ ਦੀਆਂ ਜਾਇਦਾਦਾਂ ਨੂੰ ਵੇਚ ਕੇ ਇਹ ਕਰਜ਼ਾ ਮੋੜਿਆ ਜਾਵੇ।
ਬੇਲਾਗਾਵੀ ਦੇ ਐਸਪੀ ਭੀਮਾਸ਼ੰਕਰ ਗੁਲੇਦ ਨੇ ਇਸ ਦੋਹਰੀ ਖੁਦਕੁਸ਼ੀ 'ਤੇ ਦੁੱਖ ਪ੍ਰਗਟ ਕੀਤਾ ਹੈ। ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਕਿਸੇ ਵੀ ਸ਼ੱਕੀ ਕਾਲ ਦੀ ਸੂਚਨਾ ਤੁਰੰਤ ਦਿੱਤੀ ਜਾਵੇ। ਅਫਸੋਸ ਜੋੜੇ ਨੇ ਨਾ ਤਾਂ ਗੁਆਂਢੀਆਂ ਨੂੰ ਦੱਸਿਆ ਸੀ ਅਤੇ ਨਾ ਹੀ ਪੁਲਿਸ ਨੂੰ। ਸ਼ਾਇਦ ਡਰ, ਸ਼ਰਮ ਜਾਂ ਲਾਚਾਰੀ ਨੇ ਉਨ੍ਹਾਂ ਨੂੰ ਚੁੱਪ ਰਹਿਣ ਲਈ ਮਜਬੂਰ ਕਰ ਦਿੱਤਾ ਸੀ। ਪੁਲਿਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਇੱਕ ਮੋਬਾਈਲ ਫ਼ੋਨ, ਸੁਸਾਈਡ ਨੋਟ ਅਤੇ ਦਾਤਰੀ ਜ਼ਬਤ ਕੀਤੀ ਗਈ ਹੈ। ਜੋੜੇ ਦੀ ਅੰਤਿਮ ਇੱਛਾ ਅਨੁਸਾਰ ਉਨ੍ਹਾਂ ਦੀ ਦੇਹ ਬਿਮਸ ਮੈਡੀਕਲ ਕਾਲਜ ਨੂੰ ਦਾਨ ਕਰ ਦਿੱਤੀ ਗਈ ਹੈ।
- PTC NEWS
