Dr. APJ Abdul Kalam : ਡਾ. ਕਲਾਮ ਨੇ ਕਿਉਂ ਨਹੀਂ ਕਰਵਾਇਆ ਸੀ ਵਿਆਹ, ਕੀ ਸੀ ਵਾਲਾਂ ਦੇ ਅਨੋਖੇ ਸਟਾਈਲ ਪਿੱਛੇ ਰਾਜ਼?
Dr. APJ Abdul Kalam Birthday : ਅੱਜ ਭਾਰਤ ਰਤਨ ਡਾ.ਏ.ਪੀ.ਜੇ ਅਬਦੁਲ ਕਲਾਮ ਦਾ ਜਨਮ ਦਿਨ ਹੈ। ਉਨ੍ਹਾਂ ਦਾ ਜਨਮ ਦਿਨ ਦੇਸ਼ ਹੀ ਨਹੀਂ ਬਲਕਿ ਪੂਰੀ ਦੁਨੀਆ ਧੂਮ-ਧਾਮ ਨਾਲ ਮਨਾ ਰਹੀ ਹੈ। ਸਾਬਕਾ ਰਾਸ਼ਟਰਪਤੀ ਅਬਦੁਲ ਕਲਾਮ ਦਾ ਜਨਮ 15 ਅਕਤੂਬਰ 1931 ਨੂੰ ਤਾਮਿਲਨਾਡੂ ਦੇ ਰਾਮੇਸ਼ਵਰਮ ਵਿੱਚ ਇੱਕ ਆਮ ਪਰਿਵਾਰ ਵਿੱਚ ਹੋਇਆ ਸੀ। ਉਨ੍ਹਾਂ ਦੇ ਪਿਤਾ ਇੱਕ ਮਛੇਰੇ ਸੀ। ਡਾ. ਕਲਾਮ ਨੇ ਆਪਣੀ ਮਿਹਨਤ ਦੇ ਬਲਬੂਤੇ ਅਥਾਹ ਸਫਲਤਾ ਹਾਸਲ ਕੀਤੀ। ਦੇਸ਼ ਨੂੰ ਪਹਿਲੀ ਮਿਜ਼ਾਈਲ ਵੀ ਦਿੱਤੀ, ਜਿਸ ਕਾਰਨ ਉਨ੍ਹਾਂ ਨੂੰ 'ਮਿਜ਼ਾਈਲ ਮੈਨ' ਦਾ ਨਾਂ ਦਿੱਤਾ ਗਿਆ।
ਪਾਇਲਟ ਬਣਨਾ ਚਾਹੁੰਦੇ ਸਨ ਡਾ. ਕਲਾਮ
ਅਬਦੁਲ ਕਲਾਮ ਦਾ ਸੁਪਨਾ ਹਵਾਈ ਸੈਨਾ 'ਚ ਪਾਇਲਟ ਬਣਨ ਦਾ ਸੀ, ਇਸ ਦੇ ਲਈ ਉਨ੍ਹਾਂ ਨੇ ਏਰੋਸਪੇਸ ਇੰਜੀਨੀਅਰਿੰਗ ਕੀਤੀ, ਪਰ ਇਕ ਰੈਂਕ ਘੱਟ ਹੋਣ ਕਾਰਨ ਉਨ੍ਹਾਂ ਨੂੰ ਅਯੋਗ ਕਰ ਦਿੱਤਾ ਗਿਆ। ਕਲਾਮ 29 ਸਾਲ ਦੀ ਉਮਰ ਵਿੱਚ ਡੀਆਰਡੀਓ ਦੇ ਵਿਗਿਆਨੀ ਅਤੇ 38 ਸਾਲ ਦੀ ਉਮਰ ਵਿੱਚ ਇਸਰੋ ਦੇ ਵਿਗਿਆਨੀ ਬਣੇ। ਇਸ ਤੋਂ ਬਾਅਦ ਹੀ ਭਾਰਤ ਨੇ ਆਪਣੀ ਪਹਿਲੀ ਮਿਜ਼ਾਈਲ 'ਅਗਨੀ' ਬਣਾਈ। ਅਬਦੁਲ ਕਲਾਮ ਨੇ ਪਰਮਾਣੂ ਪ੍ਰੀਖਣ ਵਿੱਚ ਵੀ ਵੱਡੀ ਭੂਮਿਕਾ ਨਿਭਾਈ ਅਤੇ ਫਿਰ 71 ਸਾਲ ਦੀ ਉਮਰ ਵਿੱਚ ਦੇਸ਼ ਦੇ 11ਵੇਂ ਰਾਸ਼ਟਰਪਤੀ ਬਣੇ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਇਸ ਸਫਲ ਜੀਵਨ ਵਿੱਚ ਉਨ੍ਹਾਂ ਨੇ ਕਦੇ ਆਪਣੇ ਵਿਆਹ ਬਾਰੇ ਨਹੀਂ ਸੋਚਿਆ।
ਕਿਉਂ ਨਹੀਂ ਕਰਵਾਇਆ ਵਿਆਹ ?
ਮੀਡੀਆ ਰਿਪੋਰਟਾਂ ਮੁਤਾਬਕ ਉਹ ਅਕਸਰ ਵਿਆਹ ਬਾਰੇ ਕਿਹਾ ਕਰਦੇ ਸਨ ਕਿ ਜੇਕਰ ਉਨ੍ਹਾਂ ਨੇ ਵਿਆਹ ਕਰਵਾ ਲਿਆ ਹੁੰਦਾ ਤਾਂ ਜ਼ਿੰਦਗੀ 'ਚ ਜੋ ਕੁਝ ਹਾਸਲ ਕੀਤਾ ਹੈ, ਉਸ ਦਾ ਅੱਧਾ ਵੀ ਹਾਸਲ ਨਹੀਂ ਕਰ ਸਕਦੇ ਸਨ। ਉਨ੍ਹਾਂ ਦਾ ਮੰਨਦਾ ਸੀ ਕਿ ਵਿਆਹ ਅਤੇ ਬੱਚੇ ਮਨੁੱਖ ਨੂੰ ਸੁਆਰਥੀ ਬਣਾਉਂਦੇ ਹਨ। ਹਾਲਾਂਕਿ ਬਾਅਦ 'ਚ ਉਹ ਵਿਆਹ ਦੇ ਸਵਾਲ ਨੂੰ ਟਾਲਣ ਲੱਗੇ ਸਨ। ਇਹ ਸਾਲ 2006 ਦੀ ਗੱਲ ਹੈ ਜਦੋਂ ਸਿੰਗਾਪੁਰ ਵਿੱਚ ਇੱਕ ਛੋਟੇ ਬੱਚੇ ਨੇ ਕਲਾਮ ਨੂੰ ਉਨ੍ਹਾਂ ਦੇ ਵਿਆਹ ਨਾ ਕਰਨ ਦਾ ਕਾਰਨ ਪੁੱਛਿਆ ਤਾਂ ਉਨ੍ਹਾਂ ਨੇ ਇਸ ਸਵਾਲ ਨੂੰ ਟਾਲਦਿਆਂ ਕਿਹਾ, 'ਮੈਂ ਚਾਹੁੰਦਾ ਹਾਂ ਕਿ ਤੁਹਾਨੂੰ ਸਾਰਿਆਂ ਨੂੰ ਇੱਕ ਚੰਗਾ ਜੀਵਨ ਸਾਥੀ ਮਿਲੇ।'
ਅਜਿਹੇ ਹੇਅਰ ਸਟਾਈਲ ਪਿੱਛੇ ਕੀ ਕਾਰਨ ਸੀ?
ਏਪੀਜੇ ਅਬਦੁਲ ਕਲਾਮ ਦਿਲਚਸਪ ਸ਼ਖਸੀਅਤ ਦਾ ਇੱਕ ਮਹੱਤਵਪੂਰਨ ਹਿੱਸਾ ਉਨ੍ਹਾਂ ਦਾ ਵੱਖਰਾ ਦਿੱਖ ਵਾਲਾ ਸਟਾਈਲ ਸੀ। ਉਹ ਆਪਣੇ ਲੰਬੇ ਵਾਲਾਂ ਨੂੰ ਵਿਚਕਾਰੋਂ ਵੱਖ ਕਰਕੇ ਰੱਖਦੇ ਸਨ। ਇਕ ਵੈੱਬਸਾਈਟ 'ਸਪੀਕਿੰਗ ਟ੍ਰੀ' ਮੁਤਾਬਕ ਕਲਾਮ ਦੇ ਜਨਮ ਤੋਂ ਹੀ ਇੱਕ ਕੰਨ ਅੱਧਾ ਸੀ, ਇਸੇ ਲਈ ਉਹ ਆਪਣੇ ਵੱਡੇ ਵਾਲਾਂ ਨਾਲ ਆਪਣੇ ਕੰਨ ਨੂੰ ਢੱਕ ਲੈਂਦੇ ਸਨ।
- PTC NEWS
