BCCI ਨੂੰ ਮਿਲਿਆ ਨਵਾਂ ਸਕੱਤਰ, ਜਾਣੋ ਕੌਣ ਹਨ ਦੇਵਜੀਤ ਸੈਕੀਆ
Devjit Saikia New BCCI Secretary : ਸਾਬਕਾ ਵਿਕਟਕੀਪਰ ਬੱਲੇਬਾਜ਼ ਦੇਵਜੀਤ ਸੈਕੀਆ ਨੂੰ ਅਧਿਕਾਰਤ ਤੌਰ 'ਤੇ ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI) ਦਾ ਨਵਾਂ ਸਕੱਤਰ ਚੁਣਿਆ ਗਿਆ ਹੈ। ਸੈਕੀਆ ਆਈਸੀਸੀ ਦੇ ਨਵੇਂ ਨਿਯੁਕਤ ਚੇਅਰਮੈਨ ਜੈ ਸ਼ਾਹ ਦੀ ਥਾਂ 'ਤੇ ਅਹੁਦਾ ਸੰਭਾਲਣਗੇ।
ਸੈਕੀਆ ਦਾ ਬੀਸੀਸੀਆਈ ਸਕੱਤਰ ਬਣਨਾ ਯਕੀਨੀ ਮੰਨਿਆ ਜਾ ਰਿਹਾ ਸੀ ਕਿਉਂਕਿ ਉਹ ਇਸ ਅਹੁਦੇ ਲਈ ਨਾਮਜ਼ਦ ਕੀਤੇ ਗਏ ਇਕਲੌਤੇ ਉਮੀਦਵਾਰ ਸਨ। ਇਸ ਦੇ ਨਾਲ ਹੀ ਪ੍ਰਭਤੇਜ ਸਿੰਘ ਭਾਟੀਆ ਨੂੰ ਖਜ਼ਾਨਚੀ ਚੁਣਿਆ ਗਿਆ ਹੈ। ਸੈਕੀਆ ਅਤੇ ਭਾਟੀਆ ਆਪੋ-ਆਪਣੇ ਅਹੁਦਿਆਂ ਲਈ ਬਿਨਾਂ ਮੁਕਾਬਲਾ ਚੁਣੇ ਗਏ। ਸੈਕੀਆ ਅਤੇ ਭਾਟੀਆ ਦੀ ਚੋਣ ਦਾ ਫੈਸਲਾ ਬੀਸੀਸੀਆਈ ਦੀ ਵਿਸ਼ੇਸ਼ ਜਨਰਲ ਮੀਟਿੰਗ (ਐਸਜੀਐਮ) ਦੌਰਾਨ ਲਿਆ ਗਿਆ।
ਦੱਸ ਦਈਏ ਕਿ ਜੈ ਸ਼ਾਹ ਦੇ ਆਈਸੀਸੀ ਪ੍ਰਧਾਨ ਬਣਨ ਤੋਂ ਬਾਅਦ ਸੈਕੀਆ ਅੰਤਰਿਮ ਸਕੱਤਰ ਵਜੋਂ ਕੰਮ ਕਰ ਰਹੇ ਸਨ। ਬੀਸੀਸੀਆਈ ਦੇ ਸੰਵਿਧਾਨ ਅਨੁਸਾਰ, ਕਿਸੇ ਵੀ ਖਾਲੀ ਅਹੁਦੇ ਨੂੰ 45 ਦਿਨਾਂ ਦੇ ਅੰਦਰ ਇੱਕ ਵਿਸ਼ੇਸ਼ ਜਨਰਲ ਮੀਟਿੰਗ ਬੁਲਾ ਕੇ ਭਰਨਾ ਹੁੰਦਾ ਹੈ। ਜੈ ਸ਼ਾਹ ਨੇ 1 ਦਸੰਬਰ, 2024 ਨੂੰ ਅਹੁਦਾ ਸੰਭਾਲਿਆ ਅਤੇ ਬੀਸੀਸੀਆਈ ਨੇ ਅਹੁਦਾ ਖਾਲੀ ਹੋਣ ਤੋਂ ਬਾਅਦ 43ਵੇਂ ਦਿਨ ਮੀਟਿੰਗ ਬੁਲਾਈ। ਭਾਟੀਆ ਆਸ਼ੀਸ਼ ਸ਼ੈਲਰ ਦੀ ਥਾਂ ਖਜ਼ਾਨਚੀ ਦਾ ਅਹੁਦਾ ਸੰਭਾਲਣਗੇ। ਆਸ਼ੀਸ਼ ਮਹਾਰਾਸ਼ਟਰ ਦੀ ਦੇਵੇਂਦਰ ਫੜਨਵੀਸ ਸਰਕਾਰ ਵਿੱਚ ਕੈਬਨਿਟ ਮੰਤਰੀ ਬਣ ਗਏ ਸਨ, ਜਿਸ ਕਾਰਨ ਉਨ੍ਹਾਂ ਨੂੰ ਬੀਸੀਸੀਆਈ ਵਿੱਚ ਆਪਣਾ ਅਹੁਦਾ ਛੱਡਣਾ ਪਿਆ ਸੀ।
ਕੌਣ ਹੈ ਦੇਵਜੀਤ ਸੈਕੀਆ?
ਸੈਕੀਆ ਇੱਕ ਸਾਬਕਾ ਪਹਿਲੀ ਸ਼੍ਰੇਣੀ ਕ੍ਰਿਕਟਰ ਹੈ, ਜਿਸਨੇ 1990 ਤੋਂ 1991 ਤੱਕ ਚਾਰ ਮੈਚ ਖੇਡੇ ਹਨ। ਉਸ ਦਾ ਕ੍ਰਿਕਟ ਕਰੀਅਰ ਕਾਫੀ ਛੋਟਾ ਰਿਹਾ ਹੈ ਅਤੇ ਇਸ ਦੌਰਾਨ ਉਸ ਨੇ 53 ਦੌੜਾਂ ਬਣਾਈਆਂ ਅਤੇ ਵਿਕਟਾਂ ਪਿੱਛੇ ਨੌਂ ਵਿਕਟਾਂ ਲਈਆਂ। ਕ੍ਰਿਕਟ ਤੋਂ ਬਾਅਦ, ਉਨ੍ਹਾਂ ਨੇ ਕਾਨੂੰਨ ਵਿੱਚ ਕਰੀਅਰ ਬਣਾਇਆ ਅਤੇ 28 ਸਾਲ ਦੀ ਉਮਰ ਵਿੱਚ, ਉਹ ਗੁਹਾਟੀ ਹਾਈ ਕੋਰਟ ਵਿੱਚ ਵਕੀਲ ਬਣ ਗਏ। ਇਸ ਨਾਲ ਹੀ, ਸਪੋਰਟਸ ਕੋਟੇ ਦੇ ਤਹਿਤ ਉਨ੍ਹਾਂ ਨੇ ਭਾਰਤੀ ਰਿਜ਼ਰਵ ਬੈਂਕ (ਆਰਬੀਆਈ) ਅਤੇ ਉੱਤਰੀ ਰੇਲਵੇ ਵਿੱਚ ਨੌਕਰੀ ਪ੍ਰਾਪਤ ਕੀਤੀ।
ਸੈਕੀਆ ਦਾ ਕ੍ਰਿਕਟ ਪ੍ਰਸ਼ਾਸਨ ਵਿੱਚ ਕੈਰੀਅਰ 2016 ਵਿੱਚ ਸ਼ੁਰੂ ਹੋਇਆ ਸੀ, ਜਦੋਂ ਉਹ ਅਸਾਮ ਕ੍ਰਿਕਟ ਸੰਘ (ਏਸੀਏ) ਦੇ ਛੇ ਉਪ-ਪ੍ਰਧਾਨ ਬਣ ਗਏ ਸਨ, ਜਿਸ ਦੀ ਅਗਵਾਈ ਹਿਮਾਂਤਾ ਬਿਸਵਾ ਸਰਮਾ, ਜੋ ਵਰਤਮਾਨ ਵਿੱਚ ਅਸਾਮ ਦੇ ਮੁੱਖ ਮੰਤਰੀ ਹਨ। ਸੈਕੀਆ 2019 ਵਿੱਚ ਏਸੀਏ ਦਾ ਸਕੱਤਰ ਬਣਿਆ ਅਤੇ ਫਿਰ 2022 ਵਿੱਚ ਬੀਸੀਸੀਆਈ ਦਾ ਸੰਯੁਕਤ ਸਕੱਤਰ ਚੁਣਿਆ ਗਿਆ।
- PTC NEWS
