Fake Visa : 300 ਕਰੋੜੀ ਜਾਅਲੀ 'ਵੀਜ਼ਾ ਫੈਕਟਰੀ' ਦਾ ਪਰਦਾਫਾਸ਼, 6 ਕਾਬੂ, 5 ਸਾਲ ਤੋਂ ਘਰੋਂ ਹੀ ਲਾਉਂਦੇ ਆ ਰਹੇ ਸੀ ਲੋਕਾਂ ਦੇ ਜਾਅਲੀ ਵੀਜ਼ੇ
Delhi Police Fake Visa Gang Busted : ਦਿੱਲੀ ਪੁਲਿਸ ਨੇ ਐਤਵਾਰ ਨੂੰ ਪੱਛਮੀ ਦਿੱਲੀ ਦੇ ਤਿਲਕ ਨਗਰ ਇਲਾਕੇ ਵਿੱਚ ਜਾਅਲੀ ਵੀਜ਼ਾ ਦੇਣ ਵਾਲੇ ਇੱਕ ਗਿਰੋਹ ਦਾ ਪਰਦਾਫਾਸ਼ ਕੀਤਾ ਅਤੇ ਘੱਟੋ-ਘੱਟ ਸੱਤ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ। ਪੁਲਿਸ ਨੇ ਇੱਕ ਨਕਲੀ ਵੀਜ਼ਾ ਫੈਕਟਰੀ ਦਾ ਪਰਦਾਫਾਸ਼ ਕੀਤਾ, ਜਿੱਥੇ ਕਈ ਦੇਸ਼ਾਂ ਦੇ ਫਰਜ਼ੀ ਵੀਜ਼ੇ ਬਣਾਏ ਜਾਂਦੇ ਸਨ। ਗਿਰੋਹ ਸੰਚਾਲਨ ਮਨੋਜ ਮੋਂਗਾ ਨਾਮ ਦਾ ਵਿਅਕਤੀ ਕਰਦਾ ਸੀ।
ਅਧਿਕਾਰੀਆਂ ਨੇ ਦੱਸਿਆ ਕਿ ਮੁੱਖ ਮੁਲਜ਼ਮ ਦੇ ਘਰੋਂ ਜਾਅਲੀ ਵੀਜ਼ਾ ਬਣਾਉਣ ਵਿੱਚ ਵਰਤਿਆ ਜਾਣ ਵਾਲਾ ਵੱਡੀ ਮਾਤਰਾ ਵਿੱਚ ਸਾਜ਼ੋ-ਸਾਮਾਨ ਜ਼ਬਤ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ ਪੁਲਿਸ ਨੇ 14 ਨੇਪਾਲੀ ਅਤੇ ਦੋ ਭਾਰਤੀ ਪਾਸਪੋਰਟ ਵੀ ਬਰਾਮਦ ਕੀਤੇ ਹਨ। ਮੁਲਜ਼ਮਾਂ ਦੀ ਪਛਾਣ ਮੁੱਖ ਮੁਲਜ਼ਮ ਮਨੋਜ ਮੋਂਗਾ (51), ਸ਼ਿਵਾ ਗੌਤਮ (42) ਵਾਸੀ ਤਿਲਕ ਨਗਰ, ਨਵੀਨ ਰਾਣਾ (25), ਬਲਬੀਰ ਸਿੰਘ (65), ਜਸਵਿੰਦਰ ਸਿੰਘ (55), ਆਸਿਫ਼ ਅਲੀ (27) ਵਜੋਂ ਹੋਈ ਹੈ। ਅਤੇ ਇੱਕ ਯਾਤਰੀ ਸੰਦੀਪ ਵਜੋਂ ਹੋਇਆ ਹੈ।
ਪੁਲਿਸ ਦੀ ਡਿਪਟੀ ਕਮਿਸ਼ਨਰ (ਇੰਦਰਾ ਗਾਂਧੀ ਅੰਤਰਰਾਸ਼ਟਰੀ ਹਵਾਈ ਅੱਡਾ) ਊਸ਼ਾ ਰੰਗਨਾਨੀ ਨੇ ਦੱਸਿਆ ਕਿ 2 ਸਤੰਬਰ ਦੀ ਰਾਤ ਨੂੰ ਹਰਿਆਣਾ ਦਾ ਰਹਿਣ ਵਾਲਾ ਸੰਦੀਪ ਭਾਰਤੀ ਪਾਸਪੋਰਟ ਲੈ ਕੇ ਇੰਦਰਾ ਗਾਂਧੀ ਅੰਤਰਰਾਸ਼ਟਰੀ ਹਵਾਈ ਅੱਡੇ ਦੇ ਡਿਪਾਰਚਰ ਇਮੀਗ੍ਰੇਸ਼ਨ ਕਾਊਂਟਰ 'ਤੇ ਪਹੁੰਚਿਆ ਸੀ। ਉਨ੍ਹਾਂ ਨੇ ਦੱਸਿਆ ਕਿ ਉਹ ਰੋਮ, ਇਟਲੀ ਜਾਣ ਦੀ ਯੋਜਨਾ ਬਣਾ ਰਿਹਾ ਸੀ ਪਰ ਉਸ ਦੇ ਦਸਤਾਵੇਜ਼ਾਂ ਦੀ ਪੜਤਾਲ ਦੌਰਾਨ ਉਸ ਦੇ ਪਾਸਪੋਰਟ 'ਤੇ ਸਵੀਡਨ ਦਾ ਜਾਅਲੀ ਵੀਜ਼ਾ ਪਾਇਆ ਗਿਆ, ਜਿਸ ਤੋਂ ਬਾਅਦ ਉਸ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ।
ਇਸ ਤਰ੍ਹਾਂ ਚੱਲ ਰਿਹਾ ਸੀ ਜਾਅਲੀ ਵੀਜ਼ੇ ਦਾ 'ਗੋਰਖਧੰਦਾ'
ਉਨ੍ਹਾਂ ਦੱਸਿਆ ਕਿ ਬਾਅਦ ਵਿੱਚ ਇਸ ਸਬੰਧੀ ਐਫਆਈਆਰ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਸੀ। ਪੁਲਸ ਨੇ ਦੱਸਿਆ ਕਿ ਵਿਦੇਸ਼ ਜਾਣ ਦੀ ਇੱਛਾ ਰੱਖਣ ਵਾਲੇ ਸੰਦੀਪ ਨੇ ਟਰੈਵਲ ਏਜੰਟ ਆਸਿਫ ਅਲੀ ਨਾਲ ਸੰਪਰਕ ਕੀਤਾ ਸੀ। ਅਲੀ ਨੇ 10 ਲੱਖ ਰੁਪਏ ਦੇ ਬਦਲੇ ਸੰਦੀਪ ਨੂੰ ਯੂਰਪੀ ਦੇਸ਼ ਭੇਜਣ ਦੀ ਗੱਲ ਕਹੀ। ਇਸ ਵਿਚ ਕਿਹਾ ਗਿਆ ਹੈ ਕਿ ਸੰਦੀਪ ਨੇ ਏਜੰਟ ਦੇ ਦੋ ਬੈਂਕ ਖਾਤਿਆਂ ਵਿਚ 7 ਲੱਖ ਰੁਪਏ ਅਤੇ 50,000 ਰੁਪਏ ਨਕਦ ਜਮ੍ਹਾ ਕਰਵਾਏ।
ਰੰਗਨਾਨੀ ਨੇ ਕਿਹਾ ਕਿ ਅਲੀ ਅਤੇ ਉਸ ਦੇ ਸਾਥੀ ਨਵੀਨ ਰਾਣਾ ਅਤੇ ਸ਼ਿਵ ਗੌਤਮ ਨੇ ਸੰਦੀਪ ਲਈ ਰੋਮ ਜਾਣ ਲਈ ਟਿਕਟਾਂ ਅਤੇ ਸਵੀਡਨ ਦੇ ਵੀਜ਼ੇ ਦਾ ਪ੍ਰਬੰਧ ਕੀਤਾ। ਉਨ੍ਹਾਂ ਦੱਸਿਆ ਕਿ ਅਲੀ, ਰਾਣਾ ਅਤੇ ਗੌਤਮ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ, ਜਿਸ ਤੋਂ ਬਾਅਦ ਬਲਬੀਰ ਸਿੰਘ ਅਤੇ ਜਸਵਿੰਦਰ ਸਿੰਘ ਨੂੰ ਵੀ ਗ੍ਰਿਫਤਾਰ ਕਰ ਲਿਆ ਗਿਆ। ਪੁਲਿਸ ਨੇ ਦੱਸਿਆ ਕਿ ਜਸਵਿੰਦਰ ਸਿੰਘ ਨੇ ਮਨੋਜ ਮੋਂਗਾ ਬਾਰੇ ਦੱਸਿਆ, ਜੋ ਨਕਲੀ ਸਟਿੱਕਰ ਡਿਜ਼ਾਈਨ ਕਰਨ ਅਤੇ ਬਣਾਉਣ ਦਾ ਮਾਹਿਰ ਹੈ। ਉਨ੍ਹਾਂ ਦੱਸਿਆ ਕਿ ਮੋਂਗਾ ਨੂੰ ਤਿਲਕ ਨਗਰ ਸਥਿਤ ਉਸ ਦੇ ਘਰੋਂ ਗ੍ਰਿਫ਼ਤਾਰ ਕੀਤਾ ਗਿਆ, ਜਿੱਥੋਂ ਉਹ ਜਾਅਲੀ ਵੀਜ਼ੇ ਬਣਾਉਣ ਦਾ ਧੰਦਾ ਚਲਾ ਰਿਹਾ ਸੀ।
ਘਰ ਵਿੱਚ ਚੱਲ ਰਹੀ ਸੀ ਵੀਜ਼ਾ ਫੈਕਟਰੀ
ਪੁਲਿਸ ਅਨੁਸਾਰ ਪੰਜ ਸਾਲ ਪਹਿਲਾਂ ਮੋਂਗਾ ਜੈਦੀਪ ਸਿੰਘ ਦੇ ਸੰਪਰਕ ਵਿੱਚ ਆਇਆ ਸੀ ਅਤੇ ਦੋਵਾਂ ਨੇ ਮਿਲ ਕੇ ਮੋਂਗਾ ਦੇ ਘਰ ਜਾਅਲੀ ਵੀਜ਼ਾ ਬਣਾਉਣ ਦੀ ਨਾਜਾਇਜ਼ ਫੈਕਟਰੀ ਲਗਾ ਦਿੱਤੀ ਸੀ। ਇਸ ਵਿਚ ਕਿਹਾ ਗਿਆ ਹੈ ਕਿ ਮੋਂਗਾ ਨੇ ਬਾਅਦ ਵਿਚ ਆਪਣੇ ਗਾਹਕਾਂ ਨੂੰ ਵੀਜ਼ਾ ਜਾਇਜ਼ ਬਣਾਉਣ ਲਈ ਫਰਜ਼ੀ ਨਿਯੁਕਤੀ ਪੱਤਰ ਦੇਣਾ ਸ਼ੁਰੂ ਕਰ ਦਿੱਤਾ।
ਪੁਲਿਸ ਅਨੁਸਾਰ ਵੱਖ-ਵੱਖ ਵਿਅਕਤੀਆਂ ਦੇ ਨਾਂਅ 'ਤੇ ਜਾਰੀ ਕੀਤੇ 30 ਜਾਅਲੀ ਸਟਿੱਕਰ ਵੀਜ਼ੇ, ਵੱਖ-ਵੱਖ ਦੇਸ਼ਾਂ ਦੇ 23 ਰਬੜ ਸਟੈਂਪ, ਇਟਲੀ ਦੇ ਤਿੰਨ ਜਾਅਲੀ ਪਰਮਾਨੈਂਟ ਰੈਜ਼ੀਡੈਂਸ (ਪੀ.ਆਰ.) ਕਾਰਡ, ਵੱਖ-ਵੱਖ ਦੂਤਾਵਾਸਾਂ ਦੀਆਂ ਤਿੰਨ ਲੱਕੜ ਦੀਆਂ ਡੀਜ਼, ਵੱਖ-ਵੱਖ ਦੇਸ਼ਾਂ ਦੇ ਚਾਰ ਮੈਟਲ ਕਾਰਡ ਬਰਾਮਦ ਹੋਏ। ਇਸ ਦੇ ਨਾਲ ਹੀ ਮੋਂਗਾ ਦੇ ਘਰੋਂ 14 ਅਸਲੀ ਨੇਪਾਲੀ ਪਾਸਪੋਰਟ, ਦੋ ਅਸਲ ਭਾਰਤੀ ਪਾਸਪੋਰਟ ਅਤੇ ਕਈ ਹੋਰ ਸਾਮਾਨ ਬਰਾਮਦ ਹੋਇਆ ਹੈ।
- PTC NEWS
