Branded Clothes : ਬ੍ਰਾਂਡੇਡ ਕੱਪੜੇ ਖਰੀਦਣ ਸਮੇਂ ਕਿਹੜੀਆਂ ਗੱਲਾਂ ਦਾ ਖਾਸ ਧਿਆਨ ਰੱਖਣਾ ਚਾਹੀਦਾ ਹੈ? ਜਾਣੋ
Branded Clothes : ਜਿਵੇਂ ਤੁਸੀਂ ਜਾਣਦੇ ਹੋ ਕਿ ਅੱਜਕਲ੍ਹ ਫੈਸ਼ਨ ਦੀ ਦੁਨੀਆਂ 'ਚ ਬ੍ਰਾਂਡੇਡ ਕੱਪੜਿਆਂ ਦਾ ਕ੍ਰੇਜ਼ ਵੱਧ ਰਿਹਾ ਹੈ। ਖਾਸ ਕਰਕੇ ਨੌਜਵਾਨਾਂ 'ਚ ਬ੍ਰਾਂਡੇਡ ਜੁੱਤੀਆਂ ਅਤੇ ਕੱਪੜੇ ਖਰੀਦਣ ਦਾ ਮੁਕਾਬਲਾ ਹੈ। ਪਰ ਕਈ ਵਾਰ, ਅਸੀਂ ਇਹ ਸੋਚ ਕੇ ਨਕਲੀ ਕੱਪੜੇ ਖਰੀਦਦੇ ਹਾਂ ਕਿ ਇਹ ਬ੍ਰਾਂਡੇਡ ਕਪੜੇ ਹਨ, ਫਿਰ ਬਾਅਦ 'ਚ ਪਤਾ ਲੱਗਦਾ ਹੈ ਕਿ ਸਾਡੇ ਨਾਲ ਧੋਖਾ ਹੋਇਆ ਹੈ। ਇਸ ਨਾਲ ਨਾ ਸਿਰਫ਼ ਸਾਡੀ ਮਿਹਨਤ ਦੀ ਕਮਾਈ ਬਰਬਾਦ ਹੁੰਦੀ ਹੈ, ਸਗੋਂ ਸਾਨੂੰ ਉਹ ਗੁਣਵੱਤਾ ਵੀ ਨਹੀਂ ਮਿਲਦੀ ਜੋ ਅਸੀਂ ਚਾਹੁੰਦੇ ਹਾਂ। ਤਾਂ ਆਉ ਜਾਣਦੇ ਹਾਂ ਬ੍ਰਾਂਡੇਡ ਕੱਪੜੇ ਖਰੀਦਣ ਸਮੇਂ ਕਿਹੜੀਆਂ ਗਲਾਂ ਦਾ ਖਾਸ ਧਿਆਨ ਰੱਖਣਾ ਚਾਹੀਦਾ ਹੈ?
ਸਿਲਾਈ ਚੈੱਕ ਕਰੋ : ਜੇਕਰ ਤੁਸੀਂ ਬ੍ਰਾਂਡੇਡ ਕੱਪੜੇ ਖਰੀਦ ਰਹੇ ਹੋ ਤਾਂ ਸਿਲਾਈ 'ਤੇ ਖਾਸ ਧਿਆਨ ਦਿਓ। ਕਿਉਂਕਿ ਚੰਗੇ ਬ੍ਰਾਂਡ ਦੀ ਸਿਲਾਈ ਸਾਫ਼-ਸੁਥਰੀ ਅਤੇ ਬਰਾਬਰ ਹੁੰਦੀ ਹੈ, ਅਤੇ ਧਾਗੇ ਵੀ ਉੱਚ ਗੁਣਵੱਤਾ ਦੇ ਹੁੰਦੇ ਹਨ। ਜੇਕਰ ਸਿਲਾਈ 'ਚ ਕੋਈ ਨੁਕਸ ਹੈ ਤਾਂ ਇਹ ਸੰਭਵ ਹੈ ਕਿ ਕੱਪੜਾ ਨਕਲੀ ਹੋਵੇ। ਇਸ ਲਈ, ਸਿਲਾਈ ਦੀ ਗੁਣਵੱਤਾ ਦੀ ਜਾਂਚ ਕਰਨਾ ਯਕੀਨੀ ਬਣਾਓ।
ਜ਼ਿਪ ਦਾ ਧਿਆਨ ਰੱਖੋ : ਬ੍ਰਾਂਡੇਡ ਕੱਪੜਿਆਂ ਦੀ ਜ਼ਿਪ ਮੁਲਾਇਮ ਅਤੇ ਉੱਚ ਗੁਣਵੱਤਾ ਵਾਲੀ ਹੁੰਦੀ ਹੈ। ਅਕਸਰ ਜ਼ਿਪ 'ਤੇ ਬ੍ਰਾਂਡ ਦਾ ਨਾਮ ਵੀ ਲਿਖਿਆ ਜਾਂਦਾ ਹੈ। ਜੇਕਰ ਜ਼ਿਪ ਕੰਮ ਨਹੀਂ ਕਰਦੀ ਜਾਂ ਇਸ 'ਤੇ ਬ੍ਰਾਂਡ ਦਾ ਨਾਮ ਨਹੀਂ ਹੈ, ਤਾਂ ਕੱਪੜੇ ਨਕਲੀ ਹੋ ਸਕਦੇ ਹਨ।
ਬਟਨ ਦੀ ਜਾਂਚ ਕਰੋ : ਜੇਕਰ ਤੁਸੀਂ ਬ੍ਰਾਂਡੇਡ ਕੱਪੜੇ ਖਰੀਦ ਰਹੇ ਹੋ ਤਾਂ ਬਟਨਾਂ 'ਤੇ ਵੀ ਧਿਆਨ ਦਿਓ। ਕਿਉਂਕਿ ਅਸਲੀ ਬ੍ਰਾਂਡ ਵਾਲੇ ਕੱਪੜਿਆਂ ਦੇ ਬਟਨਾਂ 'ਤੇ ਬ੍ਰਾਂਡ ਦਾ ਨਾਮ ਉੱਕਰਿਆ ਹੁੰਦਾ ਹੈ। ਦਸ ਦਈਏ ਕਿ ਜੇਕਰ ਬਟਨ ਸਧਾਰਨ ਦਿਖਾਈ ਦਿੰਦੇ ਹਨ ਅਤੇ ਉਨ੍ਹਾਂ 'ਤੇ ਬ੍ਰਾਂਡ ਦਾ ਨਾਮ ਨਹੀਂ ਹੈ, ਤਾਂ ਇਹ ਨਕਲੀ ਹੋ ਸਕਦਾ ਹੈ। ਇਸ ਲਈ ਖਰੀਦਦਾਰੀ ਕਰਦੇ ਸਮੇਂ ਇਸ ਗੱਲ ਦਾ ਖਾਸ ਧਿਆਨ ਰੱਖੋ।
ਲੋਗੋ ਸਮਾਨਤਾ : ਬ੍ਰਾਂਡੇਡ ਕੱਪੜਿਆਂ 'ਚ ਲੋਗੋ ਇੱਕ ਮਹੱਤਵਪੂਰਨ ਚਿੰਨ੍ਹ ਹੈ। ਜਦੋਂ ਵੀ ਤੁਸੀਂ ਕੋਈ ਚੀਜ਼ ਖਰੀਦਦੇ ਹੋ ਤਾਂ ਲੋਗੋ ਨੂੰ ਧਿਆਨ ਨਾਲ ਦੇਖੋ। ਜੇ ਸੰਭਵ ਹੋਵੇ, ਤਾਂ ਇਸਨੂੰ ਇੰਟਰਨੈਟ ਤੇ ਵੀ ਦੇਖੋ। ਅਜਿਹੇ 'ਚ ਜੇਕਰ ਲੋਗੋ ਦਾ ਡਿਜ਼ਾਈਨ ਅਤੇ ਫੌਂਟ ਅਸਲੀ ਨਾਲ ਮੇਲ ਨਹੀਂ ਖਾਂਦਾ ਹੈ, ਤਾਂ ਸਾਵਧਾਨ ਰਹੋ, ਕਿਉਂਕਿ ਇਹ ਨਕਲੀ ਹੋ ਸਕਦਾ ਹੈ।
ਟੈਗ ਚੈੱਕ ਕਰੋ : ਬ੍ਰਾਂਡੇਡ ਕੱਪੜਿਆਂ ਦੇ ਟੈਗਾਂ 'ਚ ਹਮੇਸ਼ਾ ਪੂਰੀ ਜਾਣਕਾਰੀ ਹੁੰਦੀ ਹੈ ਜਿਵੇਂ ਕਿ ਫੈਬਰਿਕ ਦੇ ਵੇਰਵੇ, ਧੋਣ ਦੀਆਂ ਹਦਾਇਤਾਂ ਅਤੇ ਨਿਰਮਾਣ ਦਾ ਸਥਾਨ। ਜੇਕਰ ਟੈਗ ਅਜੀਬ ਲੱਗਦਾ ਹੈ ਜਾਂ ਜਾਣਕਾਰੀ ਅਧੂਰੀ ਜਾਪਦੀ ਹੈ, ਤਾਂ ਇਹ ਸੰਭਵ ਹੈ ਕਿ ਕੱਪੜਾ ਅਸਲੀ ਨਹੀਂ ਹੈ। ਇਸ ਲਈ, ਖਰੀਦਦਾਰੀ ਕਰਦੇ ਸਮੇਂ ਟੈਗ ਨੂੰ ਧਿਆਨ ਨਾਲ ਦੇਖੋ।
- PTC NEWS
