Nipah Virus : ਨਿਪਾਹ ਵਾਇਰਸ ਕੀ ਹੁੰਦਾ ਹੈ? ਜਾਣੋ ਇਸ ਦੇ ਲੱਛਣ, ਕਾਰਨ ਅਤੇ ਬਚਣ ਦੇ ਤਰੀਕੇ

What Is Nipah Virus : ਕੇਰਲ 'ਚ ਇੱਕ ਵਾਰ ਫਿਰ ਨਿਪਾਹ ਵਾਇਰਸ (NiV) ਦਾ ਕਹਿਰ ਦੇਖਣ ਨੂੰ ਮਿਲਿਆ ਹੈ। ਕਿਉਂਕਿ ਇੱਥੇ ਇਸ ਖ਼ਤਰਨਾਕ ਵਾਇਰਸ ਕਾਰਨ ਇੱਕ ਵਿਅਕਤੀ ਦੀ ਜਾਨ ਚਲੀ ਗਈ ਹੈ। ਨਾਲ ਹੀ ਕਈ ਲੋਕਾਂ ਨੂੰ ਆਈਸੋਲੇਸ਼ਨ 'ਚ ਰੱਖਿਆ ਗਿਆ ਹੈ। ਰਿਪੋਰਟਾਂ ਮੁਤਾਬਕ ਜਦੋਂ ਤੋਂ ਇਹ ਮਾਮਲਾ ਸਾਹਮਣੇ ਆਇਆ ਹੈ, ਰਾਜ ਅਲਰਟ ਮੋਡ 'ਤੇ ਹੈ। ਇਹ ਇੱਕ ਘਾਤਕ ਵਾਇਰਸ ਹੈ, ਜਿਸ ਨੇ ਇੱਥੇ ਪਹਿਲਾਂ ਵੀ ਤਬਾਹੀ ਮਚਾਈ ਹੈ। ਅਜਿਹੇ 'ਚ ਇਸ ਤੋਂ ਬਚਣ ਲਈ, ਸਹੀ ਜਾਣਕਾਰੀ ਹੋਣੀ ਜ਼ਰੂਰੀ ਹੈ ਅਤੇ ਰੋਕਥਾਮ ਦੇ ਸਹੀ ਤਰੀਕਿਆਂ ਨੂੰ ਵੀ ਜਾਣਨਾ ਜ਼ਰੂਰੀ ਹੈ। ਤਾਂ ਆਓ ਜਾਣਦੇ ਹਾਂ ਨਿਪਾਹ ਵਾਇਰਸ ਕੀ ਹੁੰਦਾ ਹੈ? 'ਤੇ ਇਸ ਦੇ ਲੱਛਣ, ਕਾਰਨ ਅਤੇ ਬਚਣ ਦੇ ਕੀ ਤਰੀਕੇ ਹੁੰਦੇ ਹਨ?

ਨਿਪਾਹ ਵਾਇਰਸ ਕੀ ਹੁੰਦਾ ਹੈ? 

ਨਿਪਾਹ ਵਾਇਰਸ (NiV) ਇੱਕ ਜ਼ੂਨੋਟਿਕ ਵਾਇਰਸ ਹੈ, ਜਿਸਦਾ ਮਤਲਬ ਹੈ ਕਿ ਲੋਕ ਇਸ ਨੂੰ ਜਾਨਵਰਾਂ ਤੋਂ ਸੰਕਰਮਿਤ ਕਰ ਸਕਦੇ ਹਨ। ਨਾਲ ਹੀ ਇਹ ਮਨੁੱਖ ਤੋਂ ਮਨੁੱਖ ਦੇ ਸਿੱਧੇ ਸੰਪਰਕ ਰਾਹੀਂ ਫੈਲ ਸਕਦਾ ਹੈ। ਫਲਾਇੰਗ ਬੈਟਸ, ਕਈ ਵਾਰ ਉੱਡਣ ਵਾਲੀਆਂ ਲੂੰਬੜੀਆਂ ਵਜੋਂ ਜਾਣੇ ਜਾਣਦੇ ਹਨ, ਇਸ ਵਾਇਰਸ ਦੇ ਮੁੱਖ ਮੇਜ਼ਬਾਨ ਹਨ, ਜੋ ਸੰਕਰਮਿਤ ਫਲਾਂ ਜਾਂ ਸੂਰਾਂ ਵਰਗੇ ਜਾਨਵਰਾਂ ਦੇ ਸੰਪਰਕ ਰਾਹੀਂ ਮਨੁੱਖਾਂ ਨੂੰ ਸੰਕਰਮਿਤ ਕਰ ਸਕਦੇ ਹਨ। ਬੰਗਲਾਦੇਸ਼ ਅਤੇ ਭਾਰਤ ਸਮੇਤ ਦੱਖਣ-ਪੂਰਬੀ ਏਸ਼ੀਆ 'ਚ ਨਿਪਾਹ ਵਾਇਰਸ ਦਾ ਪ੍ਰਕੋਪ ਦੇਖਿਆ ਜਾਂਦਾ ਹੈ।

ਨਿਪਾਹ ਵਾਇਰਸ ਦਾ ਕਾਰਨ : 

ਸੰਕਰਮਿਤ ਵਿਅਕਤੀਆਂ ਦੇ ਸਰੀਰ ਦੇ ਤਰਲ ਪਦਾਰਥਾਂ ਨਾਲ ਸਿੱਧਾ ਸੰਪਰਕ, ਦੂਸ਼ਿਤ ਫਲ ਖਾਣਾ ਜਾਂ ਸੰਕਰਮਿਤ ਜਾਨਵਰਾਂ ਨਾਲ ਸੰਪਰਕ ਤਿੰਨ ਮੁੱਖ ਤਰੀਕੇ ਹਨ, ਜਿਨ੍ਹਾਂ ਨਾਲ ਨਿਪਾਹ ਵਾਇਰਸ ਫੈਲਦਾ ਹੈ। ਵਾਇਰਸ ਲੈ ਕੇ ਜਾਣ ਵਾਲੇ ਚਮਗਿੱਦੜਾਂ ਦੁਆਰਾ ਅੱਧੇ ਖਾਧੇ ਜਾਂ ਪੱਕੇ ਡਿੱਗੇ ਫਲਾਂ ਨੂੰ ਜੋ ਲੋਕ ਜਾਂ ਹੋਰ ਜਾਨਵਰ ਖਾਂਦੇ ਹਨ, ਉਹ ਨਿਪਾਹ ਵਾਇਰਸ ਦਾ ਸ਼ਿਕਾਰ ਹੋ ਸਕਦੇ ਹਨ।

ਨਿਪਾਹ ਵਾਇਰਸ ਦੇ ਲੱਛਣ : 

ਨਿਪਾਹ ਵਾਇਰਸ ਦੇ ਲੱਛਣਾਂ 'ਚ ਬੁਖ਼ਾਰ, ਸਿਰ ਦਰਦ, ਚੱਕਰ ਆਉਣੇ, ਗਲੇ 'ਚ ਖਰਾਸ਼, ਉਲਟੀਆਂ ਅਤੇ ਸਾਹ ਲੈਣ 'ਚ ਤਕਲੀਫ਼ ਸ਼ਾਮਲ ਹਨ। ਦਸ ਦਈਏ ਕਿ ਗੰਭੀਰ ਮਾਮਲਿਆਂ 'ਚ, ਲਾਗ ਇਨਸੇਫਲਾਈਟਿਸ, ਜਾਂ ਦਿਮਾਗ ਦੀ ਸੋਜ ਦਾ ਕਾਰਨ ਬਣ ਸਕਦੀ ਹੈ, ਜਿਸ ਨਾਲ ਕੁਝ ਦਿਨਾਂ 'ਚ ਭੁਲੇਖੇ, ਨੀਂਦ ਨਾ ਆਉਣਾ, ਅਤੇ ਇੱਥੋਂ ਤੱਕ ਕਿ ਕੋਮਾ ਵੀ ਹੋ ਸਕਦਾ ਹੈ। ਇਸਦੀ ਉੱਚ ਮੌਤ ਦਰ ਦੇ ਕਾਰਨ, ਇਹ ਵਾਇਰਸ ਅਕਸਰ ਲਾਗ ਦੇ ਦੋ ਹਫ਼ਤਿਆਂ ਦੇ ਅੰਦਰ ਮੌਤ ਦਾ ਕਾਰਨ ਬਣਦਾ ਹੈ।

ਨਿਪਾਹ ਵਾਇਰਸ 'ਤੋਂ ਬਚਣ ਦੇ ਤਰੀਕੇ 

• ਰੁੱਖ ਤੋਂ ਡਿੱਗੇ ਜਾਂ ਅੱਧੇ ਖਾਧੇ ਅਤੇ ਸੜੇ ਹੋਏ ਫਲਾਂ ਨੂੰ ਨਾ ਖਾਓ ਅਤੇ ਨਾ ਛੂਹੋ।
• ਬਿਮਾਰ ਜਾਨਵਰਾਂ, ਖਾਸ ਕਰਕੇ ਸੂਰਾਂ ਦੇ ਸੰਪਰਕ ਤੋਂ ਬਚੋ।
• ਆਪਣੇ ਆਪ ਨੂੰ ਸਾਫ਼ ਰੱਖੋ, ਖਾਸ ਕਰਕੇ ਆਪਣੇ ਹੱਥਾਂ ਨੂੰ ਵਾਰ-ਵਾਰ ਧੋਵੋ।
• ਸੰਕਰਮਿਤ ਜਾਨਵਰਾਂ ਜਾਂ ਲੋਕਾਂ ਦੇ ਆਲੇ ਦੁਆਲੇ ਸੁਰੱਖਿਅਤ ਕੱਪੜੇ ਪਾਓ।
• ਨਿਪਾਹ ਵਾਇਰਸ ਦੇ ਫੈਲਣ ਨੂੰ ਰੋਕਣ ਲਈ ਸੰਕਰਮਿਤ ਲੋਕਾਂ ਨੂੰ ਅਲੱਗ ਰੱਖੋ।

 ( ਡਿਸਕਲੇਮਰ : ਇਹ ਲੇਖ ਆਮ ਜਾਣਕਾਰੀ ਲਈ ਹੈ ਕੋਈ ਵੀ ਉਪਾਅ ਅਪਣਾਉਣ ਤੋਂ ਪਹਿਲਾਂ ਤੁਹਾਨੂੰ ਡਾਕਟਰ ਦੀ ਸਲਾਹ ਜ਼ਰੂਰ ਲੈਣੀ ਚਾਹੀਦੀ ਹੈ। )

ਇਹ ਵੀ ਪੜ੍ਹੋ : ਰਾਜੌਰੀ 'ਚ ਸ਼ਹੀਦ ਹੋਇਆ ਪੰਜਾਬ ਦਾ ਜਵਾਨ, ਸਾਲ ਪਹਿਲਾਂ ਹੋਇਆ ਸੀ ਵਿਆਹ, ਸਰਕਾਰੀ ਸਨਮਾਨਾਂ ਨਾਲ ਕੀਤਾ ਸਸਕਾਰ