Nepal Bus Accident : ਨੇਪਾਲ 'ਚ ਵੱਡਾ ਹਾਦਸਾ, 40 ਭਾਰਤੀਆਂ ਨਾਲ ਭਰੀ ਬੱਸ ਨਦੀ 'ਚ ਡਿੱਗੀ, 14 ਦੀ ਮੌਤ

Nepal Bus Accident : ਨੇਪਾਲ 'ਚ ਭਾਰਤੀ ਯਾਤਰੀਆਂ ਨਾਲ ਵੱਡਾ ਹਾਦਸਾ ਵਾਪਰਨ ਦੀ ਸੂਚਨਾ ਹੈ। ਭਾਰਤੀ ਯਾਤਰੀਆਂ ਨਾਲ ਭਰੀ ਬੱਸ ਤਨਹੁਨ ਸ਼ਹਿਰ ਦੀ ਮਾਰਸਯਾਂਗਦੀ ਨਦੀ ਵਿੱਚ ਡਿੱਗ ਗਈ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਬੱਸ ਵਿੱਚ ਲਗਭਗ 40 ਭਾਰਤੀ ਯਾਤਰੀ ਸਵਾਰ ਸਨ। ਦੱਸਿਆ ਜਾ ਰਿਹਾ ਹੈ ਭਿਆਨਕ ਹਾਦਸੇ ਵਿੱਚ 14 ਲੋਕਾਂ ਦੀ ਮੌਤ ਹੋ ਗਈ ਹੈ, ਜਿਨ੍ਹਾਂ ਦੀਆਂ ਲਾਸ਼ਾਂ ਬਰਾਮਦ ਕੀਤੀਆਂ ਗਈਆ ਹਨ। ਜਦਕਿ 15 ਲੋਕ ਜ਼ਖ਼ਮੀ ਹਨ ਅਤੇ ਕਈ ਅਜੇ ਵੀ ਲਾਪਤਾ ਹਨ। ਨੇਪਾਲ ਫੌਜ ਨੇ ਰਾਹਤ ਅਤੇ ਬਚਾਅ ਕਾਰਜਾਂ ਲਈ ਹੈਲੀਕਾਪਟਰ ਵੀ ਤਾਇਨਾਤ ਕੀਤੇ ਹਨ। ਨਦੀ ਦੇ ਕੰਢੇ ਇਕੱਠੇ ਹੋਏ ਲੋਕਾਂ ਦੀ ਭੀੜ ਨੂੰ ਵੀ ਸਾਵਧਾਨ ਕੀਤਾ ਜਾ ਰਿਹਾ ਹੈ।

ਨੇਪਾਲ ਪੁਲਿਸ ਨੇ ਇਸ ਘਟਨਾ ਦੀ ਪੁਸ਼ਟੀ ਕੀਤੀ ਹੈ ਅਤੇ ਕਿਹਾ ਹੈ ਕਿ ਇੱਕ ਭਾਰਤੀ ਯਾਤਰੀ ਬੱਸ ਸ਼ੁੱਕਰਵਾਰ ਨੂੰ ਤਾਨਾਹੁਨ ਜ਼ਿਲ੍ਹੇ ਵਿੱਚ ਮਾਰਸਯਾਂਗਦੀ ਨਦੀ ਵਿੱਚ ਡਿੱਗ ਗਈ। ਨਿਊਜ਼ ਏਜੰਸੀ ਏਐਨਆਈ ਅਨੁਸਾਰ, ਜ਼ਿਲ੍ਹਾ ਪੁਲਿਸ ਦਫ਼ਤਰ ਤਨਹੂਨ ਦੇ ਡੀਐਸਪੀ ਦੀਪਕੁਮਾਰ ਰਾਏ ਨੇ ਕਿਹਾ, “ਨੰਬਰ ਪਲੇਟ ਵਾਲੀ ਬੱਸ ਯੂਪੀ ਐਫਟੀ 7623 ਨਦੀ ਵਿੱਚ ਡਿੱਗ ਗਈ ਅਤੇ ਨਦੀ ਦੇ ਕੰਢੇ ਪਈ ਹੈ।” ਅਧਿਕਾਰੀ ਮੁਤਾਬਕ ਬੱਸ ਪੋਖਰਾ ਤੋਂ ਕਾਠਮੰਡੂ ਜਾ ਰਹੀ ਸੀ। ਹੋਰ ਵੇਰਵਿਆਂ ਦੀ ਉਡੀਕ ਕੀਤੀ ਜਾ ਰਹੀ ਹੈ।

ਬੱਸ ਦਾ ਰਜਿਸਟ੍ਰੇਸ਼ਨ ਨੰਬਰ ਯੂਪੀ ਐਫਟੀ 7623 ਹੋਣ ਕਾਰਨ ਇਹ ਪੁਸ਼ਟੀ ਕੀਤੀ ਗਈ ਹੈ ਕਿ ਇਹ ਉੱਤਰ ਪ੍ਰਦੇਸ਼ ਦੀ ਹੈ। ਜਾਣਕਾਰੀ ਅਨੁਸਾਰ ਗੋਰਖਪੁਰ ਤੋਂ ਇੱਕ ਯਾਤਰੀ ਦਲ ਨੇਪਾਲ ਤੀਰਥ ਯਾਤਰਾ ਅਤੇ ਸੈਰ ਸਪਾਟੇ ਲਈ ਗਿਆ ਸੀ। ਇਹ ਸਾਰੇ ਯਾਤਰੀ ਕੇਸ਼ਰਵਾਨੀ ਟਰੈਵਲਜ਼ ਦੀ ਇੱਕ ਬੱਸ ਅਤੇ ਦੋ ਵੋਲਵੋ ਵਿੱਚ ਗੋਰਖਪੁਰ ਤੋਂ ਨੇਪਾਲ ਲਈ ਰਵਾਨਾ ਹੋਏ। ਬੀਤੀ ਰਾਤ ਪੋਖਰਾ ਤੋਂ ਕਾਠਮੰਡੂ ਜਾ ਰਹੇ ਸਨ। ਇਹ ਹਾਦਸਾ ਨੇਪਾਲ ਵਿੱਚ ਮੁਗਲਿੰਗ ਤੋਂ ਪੰਜ ਕਿਲੋਮੀਟਰ ਪਹਿਲਾਂ ਵਾਪਰਿਆ।

ਨੇਪਾਲ ਦੇ ਮੀਡੀਆ ਰਿਪੋਰਟਾਂ ਮੁਤਾਬਕ ਤਨਹੂਨ ਜ਼ਿਲ੍ਹੇ ਦੇ ਡੀਐਸਪੀ ਦੀਪਕੁਮਾਰ ਰਾਏ ਦੇ ਮੁਤਾਬਕ ਬੱਸ ਨੰਬਰ ਯੂਪੀ ਐਫਟੀ 7263 ਪੋਖਰਾ ਤੋਂ 40 ਯਾਤਰੀਆਂ ਨੂੰ ਲੈ ਕੇ ਕਾਠਮੰਡੂ ਲਈ ਰਵਾਨਾ ਹੋਈ ਸੀ। ਇਹ ਬੱਸ ਪ੍ਰਿਥਵੀਰਾਜ ਮਾਰਗ ਦੇ ਦਾਮੋਲੀ ਮੁਗਲਿੰਗ ਰੋਡ ਸੈਕਸ਼ਨ ਅਧੀਨ ਅੰਬੂਖਾਰੇਨੀ ਦੇ ਆਇਨਾ ਪਹਾੜਾ ਵਿਖੇ ਮਰਸਯਾਂਗੜੀ ਨਦੀ ਵਿੱਚ ਡਿੱਗ ਗਈ ਹੈ। ਪਹਿਲੀ ਨਜ਼ਰ 'ਚ ਹਾਦਸੇ ਦਾ ਕਾਰਨ ਤੇਜ਼ ਮੋੜ 'ਤੇ ਡਰਾਈਵਰ ਵੱਲੋਂ ਬੱਸ ਦਾ ਬੇਕਾਬੂ ਹੋਣਾ ਜਾਪਦਾ ਹੈ, ਜਿਸ ਕਾਰਨ ਬੱਸ ਨਦੀ ਕੰਢੇ ਪਾਣੀ 'ਚ ਪਲਟ ਗਈ। ਤੇਜ਼ ਵਹਾਅ 'ਚ ਕਈ ਲੋਕ ਵਹਿ ਗਏ ਜਦਕਿ ਕਈਆਂ ਦਾ ਬਚਾਅ ਹੋ ਗਿਆ।