Chess Olympiad 2024 : ਸ਼ਤਰੰਜ 'ਚ ਭਾਰਤ ਦੀਆਂ ਕੁੜੀਆਂ ਨੇ ਵੀ ਕੀਤਾ ਕਮਾਲ, ਅਜ਼ਰਬਾਈਜਾਨ ਨੂੰ ਹਰਾ ਕੇ ਓਲੰਪੀਆਡ 'ਚ ਜਿੱਤਿਆ ਸੋਨ ਤਗਮਾ

Chess Olympiad 2024 : ਭਾਰਤ ਨੇ ਐਤਵਾਰ ਨੂੰ ਸ਼ਤਰੰਜ ਓਲੰਪੀਆਡ 2024 'ਚ ਡਬਲ ਧਮਾਕਾ ਕੀਤਾ। ਭਾਰਤ ਲਈ ਪੁਰਸ਼ ਟੀਮ ਵੱਲੋਂ ਸੋਨ ਤਗਮਾ ਜਿੱਤਣ ਤੋਂ ਬਾਅਦ ਭਾਰਤੀ ਮਹਿਲਾ ਟੀਮ ਵੀ ਪਿੱਛੇ ਨਹੀਂ ਰਹੀ ਅਤੇ ਮੁਕਾਬਲੇ ਦੇ ਆਖ਼ਰੀ ਦੌਰ ਵਿੱਚ ਅਜ਼ਰਬਾਈਜਾਨ ਨੂੰ ਹਰਾ ਕੇ ਆਪਣਾ ਪਹਿਲਾ ਸੋਨ ਤਗ਼ਮਾ ਜਿੱਤਿਆ। ਇਸ ਤੋਂ ਪਹਿਲਾਂ ਪੁਰਸ਼ ਟੀਮ ਨੇ 45ਵੇਂ ਸ਼ਤਰੰਜ ਓਲੰਪੀਆਡ ਵਿੱਚ ਸਲੋਵੇਨੀਆ ਖ਼ਿਲਾਫ਼ ਜਿੱਤ ਦਰਜ ਕਰਕੇ ਆਪਣਾ ਪਹਿਲਾ ਸੋਨ ਤਗ਼ਮਾ ਜਿੱਤਿਆ ਸੀ।

ਫਾਈਨਲ ਗੇੜ ਵਿੱਚ, ਦਿਵਿਆ ਦੇਸ਼ਮੁਖ, ਵੰਤਿਕਾ ਅਗਰਵਾਲ, ਡੀ ਹਰਿਕਾ ਨੇ ਭਾਰਤ ਲਈ ਇਹ ਮਹੱਤਵਪੂਰਨ ਜਿੱਤ ਦਰਜ ਕੀਤੀ, ਜਦਕਿ ਆਰ ਵੈਸ਼ਾਲੀ ਨੂੰ ਡਰਾਅ ਨਾਲ ਸੰਤੁਸ਼ਟ ਹੋਣਾ ਪਿਆ। ਇਸ ਤੋਂ ਪਹਿਲਾਂ ਭਾਰਤੀ ਮਹਿਲਾ ਟੀਮ ਨੇ 2022 ਵਿੱਚ ਚੇਨਈ ਵਿੱਚ ਕਾਂਸੀ ਦਾ ਤਗ਼ਮਾ ਜਿੱਤਿਆ ਸੀ।

ਭਾਰਤ ਨੂੰ ਅਮਰੀਕਾ ਨੇ ਮਦਦ ਕੀਤੀ, ਜਿਸ ਨੇ ਖਿਤਾਬ ਦਾ ਪਿੱਛਾ ਕਰਦੇ ਹੋਏ ਕਜ਼ਾਕਿਸਤਾਨ ਨੂੰ ਡਰਾਅ 'ਤੇ ਰੱਖਿਆ। ਹਰਿਕਾ ਅਤੇ ਵੰਤਿਕਾ ਨੇ ਆਪੋ-ਆਪਣੇ ਬੋਰਡਾਂ 'ਤੇ ਜਿੱਤ ਦਰਜ ਕੀਤੀ, ਜਦੋਂ ਕਿ ਫਾਈਨਲ ਗੇੜ ਵਿਚ ਭਾਰਤੀ ਔਰਤਾਂ ਨੇ ਅਜ਼ਰਬਾਈਜਾਨ ਨੂੰ 3.5-0.5 ਨਾਲ ਹਰਾ ਕੇ ਦੇਸ਼ ਲਈ ਸੋਨ ਤਗਮਾ ਜਿੱਤਿਆ।

ਡੀ ਹਰੀਕਾ ਨੇ ਪਹਿਲੇ ਬੋਰਡ 'ਤੇ ਤਕਨੀਕੀ ਉੱਤਮਤਾ ਦਿਖਾਈ ਅਤੇ ਦਿਵਿਆ ਦੇਸ਼ਮੁਖ ਨੇ ਇਕ ਵਾਰ ਫਿਰ ਆਪਣੇ ਵਿਰੋਧੀ ਨੂੰ ਪਛਾੜ ਕੇ ਤੀਜੇ ਬੋਰਡ 'ਤੇ ਵਿਅਕਤੀਗਤ ਸੋਨ ਤਗਮੇ 'ਤੇ ਮੋਹਰ ਲਗਾਈ। ਆਰ ਵੈਸ਼ਾਲੀ ਦੇ ਡਰਾਅ ਤੋਂ ਬਾਅਦ ਵੰਤਿਕਾ ਅਗਰਵਾਲ ਦੀ ਸ਼ਾਨਦਾਰ ਜਿੱਤ ਨੇ ਭਾਰਤੀ ਟੀਮ ਨੂੰ ਸੋਨ ਤਮਗਾ ਯਕੀਨੀ ਬਣਾਇਆ। ਭਾਰਤੀ ਪੁਰਸ਼ ਟੀਮ ਨੇ ਇਸ ਤੋਂ ਪਹਿਲਾਂ ਟੂਰਨਾਮੈਂਟ ਦੇ 2014 ਅਤੇ 2022 ਐਡੀਸ਼ਨਾਂ ਵਿੱਚ ਕਾਂਸੀ ਦੇ ਤਗਮੇ ਜਿੱਤੇ ਸਨ। ਭਾਰਤੀ ਮਹਿਲਾ ਟੀਮ ਨੇ 2022 ਵਿੱਚ ਚੇਨਈ ਵਿੱਚ ਕਾਂਸੀ ਦਾ ਤਗ਼ਮਾ ਜਿੱਤਿਆ ਸੀ।

ਇਸਤੋਂ ਪਹਿਲਾਂ ਵਿਸ਼ਵ ਚੈਂਪੀਅਨਸ਼ਿਪ ਦੇ ਚੈਲੰਜਰ ਡੀ ਗੁਕੇਸ਼ ਅਤੇ ਅਰਜੁਨ ਇਰੀਗੇਸੀ ਨੇ ਇੱਕ ਵਾਰ ਫਿਰ ਅਹਿਮ ਮੈਚਾਂ ਵਿੱਚ ਵਧੀਆ ਪ੍ਰਦਰਸ਼ਨ ਕਰਕੇ ਭਾਰਤ ਨੂੰ ਓਪਨ ਵਰਗ ਵਿੱਚ ਆਪਣਾ ਪਹਿਲਾ ਖਿਤਾਬ ਜਿੱਤਣ ਵਿੱਚ ਮਦਦ ਕੀਤੀ ਅਤੇ ਸੋਨ ਤਗਮਾ ਜਿੱਤਿਆ ਸੀ।